Gujarat News : सद्‌गुरू जगदीश वासुदेव यांच्या ‘माती वाचवा’ या मोहिमेतून प्रेरणा घेऊन अनोख्या अशा ‘बनास माती वाचवा शेतकरी उत्पादक कंपनी’ची येथे स्थापना करण्यात आली आहे.

कंपनीच्या प्रयोगशाळांचे उद्‌घाटन गुजरात विधानसभेचे अध्यक्ष शंकर चौधरी यांच्या हस्ते मंगळवारी (ता. ३) झाले. पहिल्या टप्प्यात ३००० शेतकऱ्यांची नोंदणी करण्याचे कंपनीचे उद्दिष्ट आहे.

याप्रसंगी बोलताना श्री. चौधरी म्हणाले, ‘‘शेतकरी उत्पादक कंपनीच्या सेवा आपल्या शाश्‍वत भविष्याचा पाया रचतील. शेतकऱ्यांना उत्पन्नासाठी आवश्यक असलेले ज्ञान, संसाधने आणि प्रगतीसाठी मदत होणार आहे. तसेच शेतीचा आधार असणाऱ्या मातीचीही निगा राखली जाईल.’’

‘माती वाचवा’ मोहिमेच्या मुख्य तांत्रिक अधिकारी प्रवीणा श्रीधर म्हणाल्या, ‘‘शेतकरी उत्पादक कंपनीमुळे होणाऱ्या बनासकंठ जिल्ह्यातील आव्हानात्मक मातीच्या अभ्यासाचा फायदा मध्य पूर्व आणि आफ्रिकेतील निकृष्ट माती प्रदेशांना पुनरुज्जीवित करण्यासाठी होईल, या प्रयोगामुळे जागतिक मानक प्रस्थापित होऊ शकतात.’’

कंपनीचे उपक्रम

थरड येथे बनास मृदा चाचणी प्रयोगशाळा

खिमान येथे ‘बनास जैविक खत संशोधन आणि विकास प्रयोगशाळा’ आणि शेतकरी प्रशिक्षण हॉल

सूक्ष्मजीव-जंतूंचे जीवन आणि माती आरोग्यावरील ‘माती जीवन अहवाल’

मोफत माती परीक्षण, अनुदानित दर, ड्रोन सेवा, माती व्यवस्थापन प्रशिक्षण