Sangli News : ‘‘भाडे तत्त्वावर ड्रोन घेऊन रविवारी मी उसावर कीडनाशकाची फवारणी केली होती. आणि लगेचच सोमवारी मला सांगली येथील ‘अॅग्रोवन’च्या प्रदर्शनातून चार वाजता फोन आला की तुम्ही भरलेल्या अॅग्रोवनच्या प्रवेशिकेद्वारे ड्रोनचे भाग्यवान विजेते ठरलेले आहात,’’ हे बोल आहेत तुडये (ता. चंदगड, जि. कोल्हापूर) येथील प्रयोगशील शेतकरी सतीश पाटील यांचे. ‘अॅग्रोवन’मुळेच मला स्वतःच्या मालकीचा ड्रोन मिळाला हे अतिशय आनंददायी आहे, असेही ते म्हणाले.

येथे सुरू असलेल्या ‘सकाळ- ॲग्रोवन विभागीय कृषी प्रदर्शना’त मुख्य आकर्षण असलेल्या ड्रोनचे भाग्यवान विजेते ठरले कोल्हापूर जिल्ह्यातील तुडये (ता. चंदगड) येथील प्रयोगशील शेतकरी सतीश पाटील. अत्यंत उत्कंठा पूर्ण वातावरणात प्रवेशिकेची सोडत काढण्यात आली. १८ ते २१ ऑक्टोबर या कृषी प्रदर्शनाच्या कालावधी दरम्यान ज्या शेतकऱ्यांनी कृषी प्रदर्शनास भेट देऊन प्रवेशिका जमा केल्या होत्या. त्यातून सतीश पाटील हे विजेते ठरले.

सांगली, मिरज, कुपवाड महापालिकेचे अतिरिक्त आयुक्त रविकांत अडसूळ यांच्या हस्ते व केंद्रीय जीएसटीचे वरिष्ठ निरीक्षक राजेंद्र मेढेकर, जीईईनपीएस सोल्यूशन्स कंपनीच्या किसान ड्रोनचे वितरक सौरभ घेवारी, विक्रेते विक्रम पानसरे यांच्या प्रमुख उपस्थितीत लकी ड्रॉ काढण्यात आला. या वेळी कोल्हापूर ‘सकाळ’चे संपादक निखिल पंडितराव, सांगली ‘सकाळ’चे सहयोगी संपादक शेखर जोशी, कोल्हापूर ‘ॲग्रोवन’चे वरिष्ठ व्यवस्थापक शीतल मासाळ, सांगली ‘सकाळ’चे वितरण व्यवस्थापक रामकृष्ण लोकरे, नेचर केअर फर्टिलायझर्सचे कार्यकारी संचालक जयदेव बर्वे आदींची या वेळी उपस्थिती होती.

सतीश विलास पाटील यांची तुडये येथे सात एकर जमीन आहे. यामध्ये अडीच एकरांमध्ये ऊस, तर अन्य क्षेत्रांमध्ये रताळी लागवड असते. बारावी शिकलेले सतीश पाटील हे वडिलोपार्जित शेती करतात. श्री. पाटील हे प्रयोगशील शेतकरी आहेत. मित्र परिवाराबरोबर शेती प्रदर्शन पाहणे हा त्यांचा छंद आहे. यातूनच त्यांनी मित्रांबरोबर दोन दिवसांपूर्वी सांगली येथील कृषी प्रदर्शनास भेट देऊन प्रवेशिका भरली होती. ते ‘ॲग्रोवन’चे पहिल्या दिवसापासूनचे वाचक आहेत. अत्याधुनिक तंत्राचा वापर करून शेती बदलाला त्यांनी सुरुवात केली आहे.