Nagpur News: ‘एक रुपयात पीकविमा’ योजना बंद होईल, अशी शक्‍यता वर्तविली जात असताना गुरुवारी (ता. १३) नागपूर दौऱ्यावर असताना कृषिमंत्री माणिक कोकाटे यांनी तशी शक्‍यता फेटाळून लावत याचा स्पष्ट शब्दात इन्कार केला. मात्र, या योजनेत शेतकरीपूरक बदलावर भर राहील, असेही त्यांनी सांगितले.

नागपूर दौऱ्यावर असलेल्या कृषिमंत्र्यांनी गुरुवारी (ता.१३) माध्यमांशी संवाद साधला. त्यावेळी त्यांनी एक रुपयांतील पीकविमा योजना यापुढे देखील राहील, असे स्पष्ट केले. मात्र राज्यात काही ठिकाणी पडीक जमीन त्यासोबतच बोगस लाभार्थ्यांच्या माध्यमातून या योजनेचा लाभ घेण्याचा प्रयत्न झाला. कृषी आयुक्‍तालयस्तरावरून केलेल्या पडताळणीअंती ही बाब उघडकीस आली. रॅन्डम पद्धतीने सर्व्हेक्षण करून अशा बोगस प्रकारांवर चाप लावला गेला.

त्यामुळे अशा बोगस लाभार्थ्यांना पैसे दिलेले नाहीत, देण्याचा प्रश्‍न देखील नाही. काही मुद्दे या संदर्भाने असतील तर त्यावर कृषी विभागाच्या स्तरावर चौकशीअंती कारवाई केली जात आहे. गैरप्रकारांना चाप लावण्यासाठी यापुढे देखील काही सुधारणा प्रस्तावीत करण्यात आल्या आहेत. नैसर्गिक आपत्तीमुळे शेतकऱ्यांच्या होणाऱ्या नुकसानीची भरपाई व्हावी या उद्देशाने ही योजना राबविली जात आहे.

त्यामुळे यापुढील काळात देखील ‘एक रुपयातच पीकविमा’ योजना राबविली जाणार असून अंमलबजावणी करताना केवळ काही तांत्रिक सुधारणा केल्या जातील, अशी स्पष्टोक्‍ती मंत्री श्री. कोकाटे यांनी दिली. पीकविमा योजनेत सुधारणा करताना शेतकऱ्यांच्या सूचनांचा देखील विचार करण्यात आला आहे. त्यामुळे ही योजना यापुढील काळात अधिक प्रभावीपणे राबविण्यावर भर राहील, असा दावाही त्यांनी केला.

सरकारी योजनांमध्ये बदल करावयाचा असल्याने त्याविषयी शेतकऱ्यांची मते जाणून घेण्याकरिता राज्यातील सर्वच विभागांत शेतकऱ्यांशी संवाद साधण्यावर भर दिला आहे. यापुढील टप्प्यात जिल्हा, तालुका आणि त्यानंतर प्रत्यक्ष शेतकऱ्यांच्या बांधापर्यंत जात त्यांच्या अडचणी आणि तंत्रज्ञान समजावून घेण्यावर भर राहील, असेही त्यांनी सांगितले.

सोयाबीन-कापूस खरेदी पणनचा विषय

आधारभूत किमतीने सोयाबीन खरेदी बंद झाली आहे. त्यामुळे शेतकऱ्यांना आपला शेतीमाल कमी दरात विकावा लागत आहे. त्यातच बिलिंग सॉफ्टवेअरमधील तांत्रिक अडचणीमुळे कापूस खरेदी देखील बंद आहे. याविषयी विचारणा केली असता हा मुद्दा पणन मंत्रालयाच्या अखत्यारितील असल्याने त्यावर भाष्य करणे सयुक्तिक होणार नाही, असे श्री. कोकाटे यांनी सांगितले.

कृषी साहित्य खरेदीवर बोलणे टाळले

डीबीटीऐवजी थेट कृषी साहित्य खरेदी व त्यातून झालेला गैरव्यवहार याविषयी पत्रकारांनी कृषिमंत्र्यांना विचारणा केली. मात्र याविषयी अजून माहिती घेतली नसल्याने माहिती घेऊन मी बोलेल, असे सांगून कृषिमंत्री श्री. कोकाटे यांनी वेळ मारून नेली. त्यासोबचत आमदार छगन भुजबळ यांच्याविषयीच्या प्रश्‍नाला देखील त्यांनी बगल दिली.