Akola News : सोयाबीन पिकाला शेंगा लागलेल्या नसल्याने मूर्तीजापूर तालुक्यातील जितापूर खेडकर, ब्रह्मी या भागात काही शेतकऱ्यांनी पिकावर रोटाव्हेटर फिरवला आहे. पीक नुकसानसाठी शेतकऱ्यांना आर्थिक मदत करण्याची मागणी करण्यात आली आहे.

मूर्तीजापूर तालुक्यातील जितापूर खेडकर, ब्रम्ही या भागांत खऱीप हंगामात सोयाबीनची मोठ्या क्षेत्रावर पेरणी झाली होती. काही भागात पीक सोंगणीसाठी तयार होत असताना या गावशिवारात अनेकांच्या सोयाबीन पिकात शेंगाच लागलेल्या नाहीत.

पीक येण्याची शक्यता दिसत नसल्याने शेतकरी पिकात रोटाव्हेटर फिरवत आहेत. मोठ्या मेहनतीने शेती तयार करून महागडे बियाणे, खते, फवारण्या करीत सोयाबीनच्या पिकाचे व्यवस्थापन केले होते.

परंतु अतिवृष्टी, कीडरोगांमुळे सोयाबीनच्या झाडावर शेंगाच लागल्या नाहीत. त्यामुळे सोयाबीन पिकासाठी आतापर्यंत केलेला एकरी सुमारे १५ हजारांचा खर्च वाया गेला आहे.

शासनाने एकरी २० हजारांची मदत देऊन पीकविमा देण्यास विमा कंपनीस निर्देश द्यावेत, अशी मागणी संकटग्रस्त शेतकरी धम्मानंद तायडे, रामभाऊ तायडे, राजू डोंगरे, धम्मापल डोंगरे, रणजित डोंगरे, गजानन घोडेस्वार, जनमंच, प्रगती शेतकरी मंडळाचे प्रमोद खेडकर यांनी केली.