Nashik News : उन्हाचा चटका वाढत असून दिवसा कमाल ३७ अंशांपर्यंत तापमान पोहोचले आहे. परिणामी, वाढत्या उन्हामुळे काढणीयोग्य द्राक्ष घडांचे नुकसान होत आहे. त्यामुळे तीव्र सूर्यकिरणांपासून मालाचे संरक्षण करण्यासाठी बागांवर जुन्या साड्या व कपडा अंथरला जात आहे.

देशी जुगाड उपायांमुळे उन्हाचा तडाखा कमी होऊन द्राक्षांचे सन बर्निंगपासून संरक्षण होत आहे. द्राक्ष हंगाम शेवटच्या टप्प्यात आहे. यंदा अतिवृष्टी व मान्सूनोत्तर पावसामुळे द्राक्ष बागांमध्ये नुकसान होऊन ४० टक्क्यांपर्यंत उत्पादन कमी झाले.

त्यामुळे शेवटच्या टप्प्यात हंगाम आला असताना आता द्राक्षमाल कमी उपलब्ध असल्याने मागणी वाढती आहे. या परिस्थितीत मालाची प्रतवारी टिकून ठेवण्यासाठी शेतकरी हे उपाय करत आहेत. शेतकऱ्यांनी जुन्या साड्या व पांढऱ्या कापडाचे आच्छादन बागांवर टाकले आहे.

सध्या चांदवड, दिंडोरी व निफाड तालुक्यांतील द्राक्ष खुडे सुरू आहे. सध्या मालाची उपलब्धता कमी असल्याने दर टिकून आहेत. तर तापमान ३७ अंश सेल्सिअसपर्यंत पोहोचल्यामुळे द्राक्षबागांना सन बर्निंगचा मोठा फटका बसण्याची भीती निर्माण झाली होती. उन्हाच्या तडाख्यामुळे द्राक्षांच्या गुणवत्तेवर परिणाम होऊन बाजारभाव गडगडण्याची शक्यता होती. त्यामुळे हे पर्याय वापरले जात आहेत.