Ratanagiri News : रत्नागिरी जिल्ह्याचा २०२१-२०२२ या वर्षाचा आर्थिक समालोचन अहवाल जाहीर झाला असून यामध्ये लांजा तालुक्यात ३ हजार २५० किलो प्रति हेक्टरी तांदळाची उत्पादकता (Rice Production) आहे. त्या तुलनेत गुहागर तालुक्यात सर्वांत कमी २ हजार ४१३ किलो प्रति हेक्टर उत्पादकता आहे.

नाचणीची सर्वाधिक उत्पादकता (Ragi Production) राजापूर तालुक्यात ३ हजार ३७ किलो प्रति हेक्टर आहे. उद्योग क्षेत्राचा अभाव आणि उत्पन्नाचा प्रमुख मार्ग शेती असल्यामुळे लांजा व राजापूर तालुक्यात अनुक्रमे भात आणि नाचणीची अधिक उत्पादकता असल्याचे महत्त्वपूर्ण निरीक्षण नोंदले गेले आहे.

कोकणात अधिक पर्जन्यमान आहे. त्यामुळे तांदळाचे उत्पादन अधिक घेतले जाते. रत्नागिरीतील २०२१-२२ वर्षातील तांदळाचे क्षेत्रफळ ७०६ हेक्टर होते. जिल्ह्याचे तांदळाचे एकूण उत्पादन १ हजार ९९९ टन आहे.

लांजात शेती हाच प्रमुख उत्पन्नचा स्रोत असल्यामुळे भाताची उत्पादकता अधिक असल्याचे कारण आर्थिक समालोचन नमूद केले आहे. महाराष्ट्र औद्योगिक विकास महामंडळांतर्गत असलेल्या प्रकल्पांची संख्या व सहकारी औद्योगिक विकास मंडळाच्या क्षेत्रांतर्गत प्रकल्पांची संख्या शून्य आहे.

याशिवाय विदेशी थेट गुंतवणूक, विशेष आर्थिक क्षेत्रंतर्गत उद्योगांची व मोठ्या उद्योगांची संख्या लांजा तालुक्यात २०२१-२२ या वर्षात वाढलेली नाही.

रासायनिक खतांचा संगमेश्वरात सर्वाधिक वापर

आर्थिक समालोचन अहवालानुसार खरीप हंगामात रासायनिक खतांचा २०२१-२२ वर्षात सर्वाधिक संगमेश्वर तालुक्यात २ हजार ६६८ टन केला गेला. तर सर्वांत कमी वापर खेड तालुक्यात आहे. मंडणगड तालुक्यात १७० टन आहे.

लांजा तालुक्यात प्रति हेक्टरी तांदळाची उत्पादकता अधिक होती, त्यात १ हजार ७३ टन रासायनिक खतांचा वापर केला आहे. नाचणीची सर्वाधिक उत्पादकता राजापूर तालुक्यात ३ हजार ३७ किलो प्रति हेक्टर आहे. तर सर्वांत कमी उत्पादकता संगमेश्वर तालुक्यात १ हजार ९१ किलो आहे.