Nanded News : नांदेड : जिल्ह्यातील खरीप हंगामाची नजर अंदाज पैसेवारी जाहीर झाल्यानंतर गुरुवारी (३१ ऑक्टोबर) महसूल प्रशासनाने खरिपाची सुधारित पैसेवारी जाहीर केली. यात जिल्ह्यातील सर्वच सोळा तालुक्यांची पैसेवारी पन्नास पैशाच्या आत जाहीर झाली आहे. यातून खरिपातील नुकसानीचा अंदाज येत आहे. अंतिम पैसेवारी जाहीर झाल्यानंतर जिल्ह्यातील पिकांची स्थिती लक्षात येईल. जिल्हा प्रशासन दरवर्षी खरीप पिकांच्या परिस्थितीबाबत हंगामी, सुधारित व अंतिम पैसेवारी जाहीर करते. यातून पिकांच्या उत्पादकतेचा अंदाज येतो.

हंगामी नजरअंदाज पैसेवारी जिल्ह्यात असलेल्या एक हजार ५५५ गावात आठ लाख ५० हजार ७७४ हेक्टर क्षेत्र लागवडीखाली येते. यापैकी यंदा सात लाख ९७ हजार ४६७ हेक्टरवर खरिपात पेरणी झाली आहे. या पेरणीक्षेत्रात पेरलेल्या पिकांच्या परिस्थितीचा अंदाज ता. ३० सप्टेंबर रोजी जाहीर झालेल्या हंगामी नजरी पैसेवारीवरून व्यक्त करण्यात आला होता. यात सर्वच तालुक्यांची पैसेवारी पन्नास पैशाच्याखाली जाहीर झाला होता.

यानंतर सुधारित अंदाज गुरुवारी (३१ आक्टोबर) जाहीर झाला. यात सर्वच सोळा तालुक्यांची पैसेवारी पन्नास पैशाच्या खाली जाहीर झाल्याचा अहवाल जिल्हाधिकारी अभिजित राऊत यांनी छत्रपती संभाजीनगर येथील विभागीय आयुक्तांकडे पाठविला आहे. यानंतर १५ डिसेंबर रोजी अंतिम पैसेवारी जाहीर झाल्यानंतर जिल्ह्यातील पिकांची स्थिती लक्षात येणार आहे.

तालुकानिहाय सुधारित पैसेवारी (कंसात गावांची संख्या)

नांदेड ४८ (८७), अर्धापूर ४८ (६४), कंधार ४८ (१२६), लोहा ४७ (१२६), भोकर ४९ (७९), मुदखेड ४९ (५४), हदगाव ४९ (१३७), हिमायतनगर ४८ (६४), किनवट ४८ (१९१), माहूर ४८ (८४), देगलूर ४९ (१०८), मुखेड ४८ (१३५), बिलोली ४४.५ (९२), नायगाव ४८.९१ (८९), धर्माबाद ४९ (५६), उमरी ४९ (६३). (नांदेड तालुक्यातील १७ गावांचे नागरीकरण झाले आहे.)