Latur News : मांजरा परिवारातील निवळी (ता. लातूर) येथील विलास सहकारी साखर कारखान्याप्रमाणेच निवाडा (ता. रेणापूर) येथील रेणा सहकारी साखर कारखान्याच्या संचालक मंडळाची निवडणूक बिनविरोध होणार आहे. कारखान्याच्या निवडणुकीतही सत्ताधारी पॅनेलच्या विरोधात चौघांनी दाखल केलेले पाचही अर्ज बाद झाल्यामुळे बिनविरोध निवडीचा मार्ग मोकळा झाला आहे.

अर्ज मागे घेण्याची अंतिम मुदत आठ एप्रिल असून त्यानंतर बिनविरोध निवडीची घोषणा होणार आहे. दरम्यान, निवडणुकीत यंदा ममदापूर गटातील दोन जागा वाढल्याने २१ जागांसाठी निवडणूक झाली. या दोन जागांसह पूर्वीच्या चार जागांवर नवीन चेहरे देण्यात आले असून, तब्बल पंधरा जागांवर पूर्वीच्याच संचालकांना स्थान देण्यात आले आहे.

कारखान्याच्या निवडणुकीत १७ मार्चपासून उमेदवारी अर्ज दाखल करण्यास सुरुवात झाली. विद्यमान संचालक माजीमंत्री दिलीपराव देशमुख, माजी आमदार धीरज देशमुख, माजी आमदार त्र्यंबक भिसे, विद्यमान अध्यक्ष सर्जेराव मोरे यांच्यासह २५ उमेदवारांनी ४६ उमेदवारी अर्ज दाखल केले.

या अर्जांच्या २४ मार्च रोजी झालेल्या छाननीत नरसिंग इंगळे यांचे ममदापूर गटातील दोन, सूर्यकांत बुड्डे व दिलीप राऊतराव यांचा खरोळा गटातील प्रत्येकी एक तर देविदास पवार यांचा भटक्या जमाती विमुक्त जाती मतदारसंघातील प्रत्येकी एक अर्ज बाद झाला. यातील २१ उमेदवारांचे ४१ उमेदवारी अर्ज वैध झाले आहेत.

यात सत्ताधारी पॅनेलकडून उत्पादक सहकारी संस्था गटातील दिलीपराव देशमुख यांनी एकच अर्ज दाखल केला असून तो वैध झाल्यामुळे ते बिनविरोध निवडून येणार आहे. सत्ताधारी पॅनेलच्या उर्वरित २० उमेदवारांनी प्रत्येकी दोन अर्ज दाखल केले आहेत. हे अर्ज मागे घेतल्यानंतर २१ जागांसाठीची निवडणूक बिनविरोध होणार आहे.

यात बाभळगाव गटातून धीरज देशमुख, आबासाहेब पाटील व प्रवीण पाटील, पोहरेगाव गटातून त्र्यंबक भिसे, सर्जेराव मोरे व सतीश पवार, खरोळा गटातून अनंतराव ठाकूर व चंद्रकांत सूर्यवंशी, पानगाव गटातून यशवंत पाटील व धनराज देशमुख, रेणापूर गटातून तुकाराम कोल्हे, संग्राम माटेकर व गोविंद पाटील, ममदापूर गटातून शंकरराव पाटील व रणजित पाटील, महिला प्रतिनिधी गटातून अमृता देशमुख व वैशाली माने, इतर मागासवर्गीय गटातून संभाजी रेड्डी, अनुसूचित जाती गटातून तानाजी कांबळे तर भटक्या विमुक्त जाती गटातून बालाजी हाके बिनविरोध निवडून येणार आहेत. औसा - रेणापूरचे उपविभागीय अधिकारी अविनाश कोरडे हे निवडणूक निर्णय अधिकारी म्हणून काम पहात आहेत.