Jalna News : जाफराबाद तालुक्यातील कोनड बुद्रुकच्या लघू सिंचन प्रकल्पातून रब्बीसाठी दुसरे आवर्तन सोडण्यात आले आहे. यामुळे वरूड, कोनड शिवारातील ९१६ हेक्टर क्षेत्र भिजणार असून, रब्बी पिकांना फायदा होणार आहे.

परिसरात समाधानकारक पाऊस झाला आहे. त्यामुळे कोनडच्या प्रकल्पात मुबलक पाणीसाठा असल्यामुळे रब्बी हंगामासाठी आवर्तन देणे शक्य झाले आहे. शेतकऱ्यांनी आवर्तने सुटण्याच्या अपेक्षेने ज्वारी, हरभरा पिकाची पेरणी मोठ्या प्रमाणात केली आहे.

दरम्यान, कालव्यात पाणी सुटल्याने परिसरातील पिके बहरायला सुरवात झाली आहे. पाणीपुरवठा करणाऱ्या कर्मचाऱ्यांनी शेताला पाणीपुरवठा करीत असतानाच नासाडी होणार नाही, याचीही काळजी घ्यावी.

जेणेकरून गावांना पाणीपुरवठा करण्यासाठी आगामी काळात काही अडचणी येणार नाही, अशी अपेक्षा परिसरातील ग्रामस्थ करीत आहेत.