Ahilyanagar News : अहिल्यानगर जिल्ह्यात गेल्या वीस ते पंचवीस दिवसांपासून पावसाचा खंड पडला आहे. त्याचा खरीप पिकांवर गंभीर परिणाम झाला आहे. मे महिन्यात लवकर झालेल्या पावसामुळे प्रामुख्याने कर्जत, जामखेड, श्रीगोंदा भागात लवकर पेरणी झालेल्या मूग, उडदाच्या पिकांवर गंभीर परिणाम झाला आहे.

एक तर लवकर पेरणी आणि पावसाचा खंड यामुळे ३० ते ४० टक्के क्षेत्रावरील मूग, उडदाचे पीक करपले आहे. तूर, कापसाची वाढ खुंटली आहे. पाऊस नसल्याने बाजरी, सोयाबीनसह सर्वच पिकांच्या उत्पादनात घट होण्याचा अंदाज व्यक्त केला जात आहे.

जिल्ह्यात यंदा मे महिन्यात चांगला पाऊस झाला. जूनमध्येही बऱ्यापैकी पाऊस झाल्याने खरिपाच्या पेरण्या झाल्या. प्रामुख्याने लवकर झालेल्या पावसामुळे मूग, उडदाची पेरणी झाली. आतापर्यंत जिल्ह्यात खरिपाचे सरासरी क्षेत्र ७ लाख १६ हजार २०८.६ हेक्टर आहे. त्यापैकी ६ लाख ७४ हजार ६९४.१९ हेक्टर क्षेत्रावर पेरणी झाली आहे.

एकूण ९४.२ टक्के पेरणी झाली आहे. अकोले तालुक्यात रोपवाटिका प्रक्षेत्रावर २५८० हेक्टर क्षेत्रावर भात रोपे तयार करण्यात आलेली आहेत. मात्र गेल्या वीस-पंचवीस दिवसांपासून पावसाचा खंड पडला आहे. अधून-मधून पडणाऱ्या रिमझिम पावसाचा अपवाद वगळता सर्वच भागात पाऊस नसल्याने त्याचा परिणाम पिकांवर झाला आहे.

याशिवाय पावसाच्या खंडाने खरीप पेरणीही गतवर्षीपेक्षा कमी झाली. अहिल्यानगर जूनमध्ये १७७.३ मिलिमीटर इतका झाला. जुलैमध्ये १५४.५ मिलिमीटर पावसाची नोंद झाली आहे.

तालुकानिहाय पावसाची स्थिती

२५ ते ५० टक्क्यांपर्यंत पाऊस ः श्रीरामपूर, पाथर्डी

५० ते ७५ टक्क्यांपर्यंत पाऊस ः नगर, कोपरगाव, राहाता, जामखेड, शेगाव, नेवासा, राहुरी,

७५ ते शंभर टक्क्यांपर्यंत पाऊस १०० ः संगमनेर, अकोला, पारनेर, श्रीगोंदा, कर्जत,

फवारणीचा खर्च महागला

अहिल्यानगर जिल्ह्यातील शेवगाव, पाथर्डी, नेवासा भागात कापसावर तुडतुडे, मावा पडला असून काही ठिकाणी कापसाच्या झाडांचे नुकसान होत आहे. श्रीरामपूर, राहुरी, पारनेर, कोपरगाव तालुक्यांत काही ठिकाणी तूर, सोयाबीनला हुमणी अळीचा फटका बसत आहे. शेतकरी कापूस, तूर, सोयाबीनवर फवारणी करत असून यंदा फवारणीचा खर्च पंधरा टक्क्यांनी वाढला आहे. कापूस, तूर, सोयाबीनसह अन्य पिकांवरील रोगांची नुकसानपातळी १० ते १५ टक्क्यांच्या जवळपास असली तरी पाऊस नसल्याने नुकसानीत अजून भर पडण्याची भीती शेतकरी व्यक्त करत आहेत.