Kolhapur News: कोल्हापूर जिल्ह्यात पावसाची उघडझाप सुरूच आहे. सकाळी सहा ते दहा वाजेपर्यंत ठिकठिकाणी पाऊस सुरूच होता. सोमवारी दुपारी बारापर्यंत राजाराम बंधाऱ्याची पातळी १७.७ फूट इतकी होती. अद्याप राजाराम बंधाऱ्यासह रुई, इचलकरंजी, यवलूज, शिरोळ हे बंधारे पाण्याखालीच आहेत.

पावसाने उघडीप दिल्याने रविवारी (ता. २५) पंचगंगेच्या पाणी पातळीत दिवसभरात पाच इंचांनी घट झाली.रात्री राजाराम बंधारा येथे पाणी पातळी १७ फूट चार इंचांवर राहिली. अद्याप या बंधाऱ्यावर पाणी असल्याने येथील वाहतूक बंदच ठेवण्यात आली आहे. जिल्ह्यात दिवसभरात काही काळ पावसाची उघडीप राहिली.

अद्याप शेतात पाणी असल्याने काढणीला आलेली पिके खराब होण्याची परिस्थिती निर्माण झाली आहे.तर पाऊस न थांबल्याने पेरणी कशी करायची, हा प्रश्‍न शेतकऱ्यांसमोर आहे. अजूनही पुढील दोन दिवस जोरदार पावसाचा इशारा दिल्याने शेतकऱ्यात चिंतेचे वातावरण कायम आहे.

मॉन्सूनपूर्व पावसामुळे कापणीस आलेली उन्हाळी पिके कुजू लागली आहेत. त्यामुळे बळीराजाच्या चेहऱ्यावर चिंतेचे ढग दाटू लागले आहेत. उन्हाळी सूर्यफूल, भुईमूग, नाचणा, मका, भात आदी पिकांस फटका बसला आहे. तसेच मागील दहा-बारा दिवसांपासून पावसाची रिपरिप असल्यामुळे शेतात असणारी हातातोंडाशी आलेली पिके काढण्याच्या चिंतेत शेतकरी आहेत.

मॉन्सूनपूर्व मशागतीची कामे खोळंबली आहेत. कापणीयोग्य उन्हाळी भात पिकास फटका आहे. भातमळणी केलेल्या शेतकऱ्यांचे पिंजर भिजले असून सततच्या पावसामुळे ते कुजले आहेत. परिपक्व भूईमूग, सूर्यफूल, मक्याला अंकुर येण्यास सुरुवात झाली आहे.