Sindhudurga News : जिल्ह्यात रब्बी हंगामाला तब्बल वीस ते पंचवीस दिवस विलंबाने प्रारंभ झाला आहे. शेती मशागतीला गती प्राप्त झाली आहे. सध्या शेतकरी जमिनीची नांगरणीत व्यस्त आहेत.

लांबलेल्या पावसामुळे जिल्ह्यात खरीप हंगाम यावर्षी लांबला. अजूनही काही भागात भातपीक कापणी आणि नाचणी पीक वेचणी सुरू आहे. बरेच शेतकरी भातपीक लागवड असलेल्या शेतातच रब्बी उत्पादन घेतात.

लांबलेल्या खरीप हंगामाचा मोठा परिणाम यावर्षीच्या रब्बी हंगामावर झाला. रब्बी हंगाम तब्बल वीस ते पंचवीस दिवसांनी आता सुरू झाला आहे. शेतकऱ्यांनी रब्बी पिकाच्या दृष्टीने नांगरणी, कुंपण आदी कामे सुरू केली आहेत.

जिल्ह्यात रब्बी हंगामात प्रामुख्याने कुळीथ, भुईमूग, मूग, उडीद, कलिंगड, काकडी, टॉमेटो, कोबी, भातपीक, नाचणी पीक लागवड केली जाते. १० ते १५ हजार हेक्टर क्षेत्रावर जिल्ह्यात रब्बी पिकांची लागवड होते.

याशिवाय मुळा, पालेभाजी, फळभाज्या आदी पिकांची लागवड देखील केली जाते. जिल्ह्यातील पाण्याची उपलब्धता असलेल्या गावांमध्ये अलीकडे भाजीपाला लागवडीखालील क्षेत्र वाढले आहे.