Jalgaon News : खानदेशात रब्बी हंगामातील पिकांची पेरणी पूर्ण झाली आहे. काही पिके मळणीवरही येत आहेत. रब्बीसाठी यंदा गिरणासह अन्य सिंचन प्रकल्पांतून सिंचनासाठी पाणी मिळत आहे. खरिपात पिकांचे मातेरे झाले. आता रब्बीत खरिपातील नुकसानीची भरपाई निघेल, अशी अपेक्षा आहे.

गिरणा धरणातून मागील हंगामात रब्बीला पाणीच मिळाले नव्हते. कारण दुष्काळी स्थितीमुळे हे धरण मागील वेळेस फक्त ५६ टक्के भरले होते. यंदा हे धरण १०० टक्के भरले. यामुळे गिरणा पट्ट्यातील २१ हजार हेक्टरला या धरणातून पाणी मिळत आहे. तसेच जळगाव जिल्ह्यात हतनूर, वाघूर, धुळ्यात अनेर, पांझरा या प्रकल्पांतूनही रब्बीस पाणी मिळत आहे.

हरभरा, दादर ज्वारी, मका, भाजीपाला पिके, कांदा, सोयाबीनची पेरणी रब्बी हंगामात सुमारे ११० टक्के झाली आहे. उन्हाळ पिकांचीदेखील पेरणी होत आहे. सोयाबीन पेरणीचेही नियोजन अनेकांनी केले असून, २००० ते २५०० हेक्टरपर्यंत जळगाव जिल्ह्यात रब्बीतील क्षेत्र पोचेल, असा अंदाज आहे. ही पेरणी सुरू आहे.

त्यात भुईमूग, सूर्यफूल पेरणीही होत आहे. सोयाबीनचे दर कमी अधिक झाले आहेत. परंतु रब्बीत मका, गहू, ज्वारी पीक परवडत नाही, असेही शेतकरी मानतात. खरिपातील पिके परवडली नाहीत. कापूस उत्पादक जेरीस आले आहेत. यंदा रब्बीबाबत अपेक्षा असून ऑक्टोबरच्या मध्यात रब्बीची पेऱणी सुरू झाली.

यंदा शेतकऱ्यांना खरिपात सोयाबीनचे चांगले उत्पादन आले. रब्बीतही अनेकांनी सोयाबीनला पसंती दिली आहे. त्यास दोन फवारण्या व एकदा रासायनिक खते देवूनही उत्पादन बऱ्यापैकी येते, असे निरीक्षण, अनुभव अनेकांना आहे. यामुळे यंदाही रब्बीत शेतकरी मका, ज्वारी यासह तेलबिया पिकांत सोयाबीनची पेरणी भुईमूगापेक्षा अधिक झाली आहे.

मका, गहू जोमात

कापूस पीक घेऊन त्यात मक्याची लागवड करण्याचे नियोजन शेतकऱ्यांनी केले. पूर्वहंगामी कापूस पिकाखालील क्षेत्र त्यासाठी शेतकरी ऑक्टोबरच्या अखेरीस रिकामे करण्यास सुरवात झाली. त्यात पूर्वमशागत करून मका व अन्य भाजीपाला पिके घेतली आहेत. गहू पेरणीही यंदा जळगाव जिल्ह्यात सिंचन प्रकल्पातून पाणी मिळाल्याने ६० हजार हेक्टरवर झाली आहे. मका लागवड जळगाव जिल्ह्यात एक लाख दोन हजार हेक्टर एवढी आहे.