Nagpur News: राज्यात रेशीम शेतीचा विस्तार वाढता असतानाच काही वेळा कोषाची प्रत अपेक्षित मिळत नाही. मात्र याच टाकाऊ कोषापासून बुके आणि हार तयार करीत त्यापासून चांगले उत्पन्न मिळविण्यात अमरावती, सातारा, कोल्हापूर आणि बीडचे शेतकरी यशस्वी झाले आहेत.

राज्यात रेशीम शेतीचा विस्तार वाढता आहे. सध्या चांगल्या दर्जाच्या कोषाला ७२० ते ७३० रुपये किलोचा दर मिळत आहे. मात्र अनेकदा काही कारणांमुळे डागी, पोचट, डब्बल अशाप्रकारचा कमी प्रतीचा कोष राहतो. याला बाजारात मागणी राहत नाही. त्यामुळे ७० ते १०० रुपये किलोने हा विकावा लागतो. याच टाकाऊ कोषापासून शोभीवंत हार आणि बुके तयार करीत त्याला बाजारपेठ मिळविण्यात शेतकरी यशस्वी झाले आहेत.

काकरवाडी (माजलगाव, बीड) प्रियंका शिवराज फाटे (पवार) यांनी २०२३ मध्ये पहिल्यांदा टाकाऊ कोषापासून हार, बुके तयार केले. दीड ते दोन किलो कोषाचा वापर करून तयार केलेल्या हाराची किंमत २५०० रुपये आहे. कोषाला रंग द्यायचा सोबतच लाकडी शोभीवंत मण्यांचा वापर देखील यात होतो, असे प्रियंकाचे वडील शिवराज सांगतात. महालक्ष्मी तसेच दिवाळी काळात याला मागणी राहते.

एकदा हा हार घेतल्यास २५ वर्षांपेक्षा अधिक काळ तो टिकतो. विक्रीकरिता सोशल मीडियाचा प्रभावी वापर करण्यात आला. त्यातूनच पुणे, मुंबई, हैदराबाद या भागातून कोष हाराला मागणी वाढली. तत्कालीन कृषिमंत्री अब्दुल सत्तार, संदीपान भुमरे यांच्या स्वागतासाठी या हारांचा वापर झाला.