Dharashiv News : आगामी गाळप हंगामासाठी जिल्ह्यातील काही साखर कारखान्यांनी तयारी सुरू केली आहे. कारखान्यातील यंत्रसामग्रीची दुरुस्ती करण्याची कामे सुरू करण्यात आली आहेत. यंदा जिल्ह्यातील किमान १३ साखर कारखान्यांचे हंगाम सुरू होण्याची शक्यता व्यक्त केली जात आहे. मात्र, गेल्या वर्षीच्या तुलनेत यंदा उसाची कमतरताही भासण्याची शक्यता आहे.
जिल्ह्यात सहकारी व खासगी मिळून जवळपास १५ साखर कारखाने आणि चार गूळपावडर निर्मितीचे कारखाने आहेत. यंदाच्या गळीत हंगामात यापैकी किमान १३ साखर कारखाने व चार गूळपावडर निर्मितीच्या कारखान्यांचे गाळप हंगाम सुरू होण्याची शक्यता आहे. जिल्ह्यात साधारणतः दसरा व दिवाळी सणाच्या दरम्यान म्हणजे ऑक्टोबर महिन्यात बॉयलर अग्निप्रदीपन कार्यक्रम केले जातात. त्यापूर्वी कारखान्यातील मशिनरी अद्ययावत करून ठेवल्या जातात. त्याचे काम आता काही साखर कारखान्यांनी सुरू केले आहे.
दीड ते दोन महिन्यांचा कालावधी यासाठी लागतो.
जिल्ह्यात कृषी विभागाकडील आकडेवारीनुसार उसाचे सरासरी क्षेत्र ७४ हजार हेक्टर आहे. गेल्या वर्षी जवळपास १३ कारखान्यांनी आणि चार गूळपावडर निर्मिती कारखान्यांची उसाचे गाळप केले होते. यंदाही हे सर्व कारखाने गाळप करण्याच्या तयारीत आहेत. त्यापैकी दोन कारखान्यांनी मिल रोलरचे पूजन करून मशिनरीच्या दुरुस्तीला सुरवात केली आहे.
जिल्ह्यातील आठही तालुक्यांत साखर कारखाने आहेत. त्यात उमरगा तालुक्यात दोन, लोहारा तालुक्यात एक, तुळजापूर तालुक्यात दोन, धाराशिव तालुक्यात तीन, कळंब तालुक्यात दोन, वाशी तालुक्यात दोन, भूम तालुक्यात दोन तर परंडा तालुक्यात एक साखर कारखाना आहे. याशिवाय गूळपावडर निर्मितीचे चार कारखाने आहेत. हे सर्व कारखान्यांनी यंदा गाळप हंगाम सुरू केले तर कार्यक्षेत्रातील शेतकऱ्यांच्या उसाचे वेळेत गाळप होऊ शकेल, असा अंदाज ऊसउत्पादक व्यक्त करीत आहेत.
यंदा उसाची कमतरता भासण्याची शक्यता
गेल्या वर्षी पाऊस कमी झाल्याने अंदाज पाहून अनेक शेतकऱ्यांनी ऊसलागवड केली नव्हती. अल्प पावसामुळे भूगर्भातील पाणीसाठ्यात अपेक्षित वाढ झाली नसल्यामुळे उन्हाळ्यात उसाच्या पिकाला पाणी कमी पडून नुकसान होण्याची शक्यता असल्याने अनेकांनी नव्याने उसाची लागवड केली नाही. परिणामी आगामी गाळप हंगामात काही कारखान्यांना गाळपासाठी उसाची कमरतरता निर्माण होण्याची शक्यता आहे. त्यामुळे काही कारखान्यांना कार्यक्षेत्रातील उसाबरोबरच गेटकेनचा ऊस आणून गाळप करावे लागणार आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.