Ambegaon News : यंदा बटाटा पिकाला लागणाऱ्या पोषक थंडीअभावी आणि अवेळी पडलेल्या पावसाचा फटक्यामुळे बटाटा उत्पादनावर मोठा परिणाम झाला आहे. मागील वर्षीच्या तुलनेत यंदा उत्पादनखर्चही वाढला आणि उत्पादनही निम्म्याने घटले आहे, परंतु समाधानकारक बाजारभाव मिळाल्याने शेतकऱ्याला आधार मिळाला. त्यामुळे उत्पादन घटले पण बाजारभावाने काहीसे तारले, अशी परिस्थिती यंदा पहावयास मिळत आहे.

यंदाच्या वर्षी लागवडीसाठी लागणाऱ्या बटाटा बियाण्याचे दर कडाडल्याने भांडवली खर्चात मोठी वाढ झाली, याचा परिणाम बटाटा लागवडीवर झाला. यंदा बटाटा पिकाचे आगार म्हणून ओळख असलेल्या नागापूर, थोरांदळे, जाधववाडी, रांजणी, नागापूर परिसरांत याचा परिणाम होऊन लागवडीत मोठी घट झाली आहे. यंदाच्या वर्षी शेतकऱ्याला बटाटा बियाणे ३५०० ते ४५०० प्रतिक्विंटल दराने खरेदी करावे लागले हाच दर मागील वर्षी निम्म्याने होता. बियाण्याचा वाढलेला दर आणि उत्पादन खर्च यामुळे एकरी खर्च एक लाखाच्या वर शेतकऱ्याला करावा लागला.

आंबेगाव तालुक्याच्या पूर्व भागात खरीप हंगामातील बटाटा काढणी सध्या अंतिम टप्प्यात आली आहे. बटाटा फुगवणीचा काळ आणि पाऊस पडण्याची वेळ एक आली आणि पिकाला पोषक थंडी न मिळाल्याचा परिणाम बटाटा उत्पादनावर झाला आहे. यंदा बटाट्याचे उत्पादन मागील वर्षीच्या तुलनेत निम्म्याने घटले आहे, पण बाजारभाव मागील वर्षीच्या तुलनेत दुपटीने मिळाल्याने शेतकऱ्यांना आधार मिळाला आहे. यंदाच्या वर्षी शेतकऱ्याच्या बटाट्याला ३२५ रुपये दहा किलोमागे सर्वाधिक दर मिळाला असून सध्या बटाट्याला २५० ते २६० रुपये प्रति दहा किलोमागे दर मिळत आहे. यंदा उत्पादन सरासरी पिशवीमागे ७ ते ८ पिशवीचे गळीत मिळाले आहे. मागील वर्षी उत्पादन चांगले मिळाले पण बाजारभाव कमी मिळाला.

पाच वर्षांतील बटाटा विक्री दर (सर्व दर प्रती १० किलोचे आहे)

२०२० ९० ते १२०

२०२१ ३०० ते ३२०

२०२२ १५० ते २००

२०२३ १०० ते १५०

२०२४ २६० ते ३२५