Nagar News : नगर जिल्‍ह्यातील तालुका व गावपातळीवर सुरू असलेली विकसित भारत संकल्‍प यात्रा यशस्‍वी करायची आहे. त्यासाठी अधिकारी, पदाधिकारी यांनी प्रभावीपणे नियोजन करून संकल्‍प यात्रेसाठी काम करावे, असे आवाहन जिल्‍हाधिकारी सिद्धराम सालीमठ यांनी केले.

‘विकसित भारत संकल्‍प यात्रा’ नगर जिल्‍ह्यात प्रभावीपणे यशस्‍वी करण्‍यासाठी जिल्‍हाधिकारी कार्यालयात बैठक झाली. जिल्‍हा परिषद मुख्‍य कार्यकारी अधिकारी आशिष येरेकर, अप्‍पर जिल्‍हाधिकारी बाळासाहेब कोळेकर यांच्यासह अधिकारी, कर्मचारी उपस्थित होते.

सालीमठ म्‍हणाले, की केंद्र शासनाच्‍या वतीने विकसित भारत संकल्‍प यात्रा हा महत्त्वाकांक्षी उपक्रम जिल्‍ह्यामध्‍ये तालुका, गावपातळीवरील लोकांना केंद्र व राज्‍य शासनाच्‍या विविध योजनांचा लाभ मिळवून देण्‍यासाठी आयोजित करण्‍यात आला आहे.

या संकल्‍प यात्रेच्‍या माध्‍यमातून ग्रामीण भागातील सर्व घटकांतील लोकांना विविध शासकीय योजनांचा लाभ देण्‍यात येत आहे. या उपक्रमात शासनाच्‍या योजनांच्‍या लाभांपासून जे लोक वंचित राहिले आहेत, त्‍यांना लाभ मिळवून देण्‍यासाठी गावागावांत जनजागृती करून समाजातील शेवटच्‍या घटकापर्यंत लोकांना लाभ मिळाला पाहिजे या दृष्‍टीने शासकीय अधिकारी व राजकीय पक्षांचे पदाधिकारी यांनी समन्‍वय ठेऊन ही संकल्‍प यात्रा यशस्‍वी करावी, असे त्‍यांनी सांगितले.