Pune News: पुणे जिल्हा सहकारी बँकेने सन २०२४-२५ या आर्थिक वर्षामध्ये ठेवी, कर्ज, व्यावसायिक उलाढाल, वसुली, स्वनिधी, नफा, नेटवर्थ, ठेवी, कर्जे, एन.पी.ए. वसुली प्रोव्हिजन कव्हरेज रेशो या सर्व पातळीवर ऐतिहासिक कामगिरी केलेली आहे. बँकेची गत वर्षाच्या तुलनेत व्यवसायामध्ये ३०७३ हजार कोटी ६६ लाख रुपयांची भरीव वाढ होऊन २६ हजार ८२६ कोटी रुपयांची व्यावसायिक उलाढाल झाली आहे. बँकेस तरतूदपूर्व नफा ४३९ कोटी ६१ लाख रुपये व निव्वळ नफा ७५ कोटी ७५ लाख रुपयांचा झाला आहे, अशी माहिती बँकेचे चेअरमन डॉ. दिगंबर दुर्गाडे यांनी दिली.

पुणे जिल्हा मध्यवर्ती सहकारी बँकेच्या २०२५ या वर्षातील आर्थिक स्थितीचा आढावा विषयी माहिती बँकेचे चेअरमन डॉ. दिगंबर दुर्गाडे यांनी शुक्रवारी (ता. २) दिली. या वेळी व्हा चेअरमन सुनील चांदेरे, मुख्य कार्यकारी अधिकारी अनिरुद्ध देसाई, संचालक संभाजी होळकर, पूजा बुट्टे पाटील, निर्मला जागडे, प्रवीण शिंदे आदी उपस्थित होते.

श्री. दुर्गाडे म्हणाले, की देशातील जिल्हा मध्यवर्ती सहकारी बँकांमध्ये प्रथम क्रमांकाची व्यावसायिक उलाढाल असणारी व पहिल्या पाच क्रमांकामध्ये असणाऱ्या अर्बन शेड्यूल्ड सहकारी बँकांशी तुलना करता पुणे जिल्हा मध्यवर्ती सहकारी बँकेने अग्रगण्य स्थान प्राप्त केलेले आहे. तर बँकेने सन २०२४-२५ या आर्थिक वर्षामध्ये खरीप व रब्बी हंगामासाठी एकूण ३.१२,६३९ सभासदांना २९९१ हजार ८३ लाख रुपयांचे कर्ज वितरित केले असून सदर कर्जाचे १०९ टक्के उद्दिष्ट पूर्ण केले आहे.

बँकेने शेती व शेतीपूरक व्यवसायासाठी सन २०२४-२५ या आर्थिक वर्षामध्ये १००५१ सभासदांना ४०७ कोटी १४ लाख रुपयांचे मध्यम मुदत कर्ज वितरित केले आहे. तर मार्च २०२५ अखेर बँकेचा ढोबळ एन.पी.ए. २.६० टक्के असून बँकेचा नेट एन.पी.ए. शून्य टक्का आहे.

पीककर्जाची फक्त मुद्दल रक्कम आदा करून संस्था पातळीवरील सन २०२४-२५ च्या पीक कर्जाची वसुली करणे संदर्भात बँकेने कार्यवाही केली आहे. ज्या सभासदांनी व्याज रक्कम भरून पीक कर्जाची परतफेड केली आहे त्यांची व्याजाची रक्कम बँकेमार्फत आदा करण्याचा निर्णयही बँकेच्या संचालक मंडळाने घेतला आहे. तसेच सहकारी संस्थांना आर्थिक नुकसान होऊ नये म्हणून संस्थांनी शासन येणे दर्शविलेले व्याजाची रक्कम ९३ कोटी २० कोटी देखील बँकेमार्फत सहकारी संस्थांना आदा करण्यात आली आहे.