Nagpur News: जनावराच्या विविध अंगाची लांबी, रुंदी मोजत त्या आधारे वजन सांगणारे ‘पशुभार’ ॲप शिरवळ (जि.सातारा) येथील क्रांतिसिंह नाना पाटील पशुवैद्यक महाविद्यालयातील तज्ज्ञांनी विकसित केले आहे.

जनावरांचे वजन करण्यासाठी पशुपालकांना विविध अडचणींचा सामना करावा लागतो. गावस्तरावर यंत्रणा उपलब्ध नाही.या पार्श्‍वभूमीवर शिरवळ येथील पशुवैद्यकीय महाविद्यालयाच्या तज्ज्ञांनी पुढाकार घेत जनावरांच्या विविध भागाचे मोजमाप करीत त्याआधारे वजन सांगणारे ॲप तयार केले आहे. पहिल्या टप्प्यात होल्स्टिन फ्रिजियन (एचएफ) आणि पंढरपुरी म्हशीचे वजन माहिती करून घेता येणार आहे.

यापुढील टप्प्यात सर्वच जनावरांसाठी हे ॲप उपलब्ध राहील, अशी माहिती डॉ. तेजस शेंडे यांनी दिली. या संशोधनासाठी माफसूचे कुलगुरू डॉ. नितीन पाटील, पशुविज्ञान शाखेचे अधिष्ठाता डॉ. एस. व्ही. उपाध्ये, संशोधन संचालक डॉ. नितीन कुरकुरे, विस्तार संचालक डॉ. अनिल भिकाने, सहयोगी अधिष्ठाता डॉ. एम. डी. मेश्राम यांचे मार्गदर्शन मिळाले आहे.

एचएफ गाईचे वजन जाणून घेण्यासाठी छातीचा घेर, पोटाचा घेर, शरीराची लांबी, खांद्याची उंची, मांडीचा घेर या भागाचे माप सेंटिमीटरमध्ये घ्यावे लागते. ही माहिती ॲपवर भरल्यानंतर जनावरांचे वजन कळते. पंढरपुरी म्हशीचे वजन मिळवण्यासाठी मानेचा घेर, ढोपर हाडांमधील अंतर, शरीराची लांबी, खांद्याची उंची, पोटाचा घेर ही माहिती ॲपमध्ये भरावी लागते.