Pune News: राज्यासह पुणे जिल्ह्यातील विविध गावांतील पाणंद, शेतरस्ते खुले करण्याची मोहीम वेगाने राबविण्यात येत आहे. या पार्श्‍वभूमीवर जिल्हा प्रशासनाने पाणंद, शेतरस्त्यांच्या मोजणीसाठी फी न आकारण्याचा निर्णय घेतला असून, तसे पत्र भूमिअभिलेख विभागाला दिले आहे. त्यामु‌ळे आता शेतरस्त्यांसाठी मोजणीचे शुल्क शेतकऱ्यांना भरावे लागणार नाही. या निर्णयामुळे रस्ते खुले करण्याच्या कामास गती येणार आहे.

सध्या जिल्ह्यात अतिक्रमित झालेले रस्ते, तसेच रस्त्याची हद्द कुठे आहे, हे समजण्यासाठी या रस्त्यांची मोजणी करावी लागते. या मोजणीसाठी शेतकऱ्यांना भूमिअभिलेख विभागाकडे ‘मोजणी फी’ भरावी लागत होती.

त्यामुळे ‘मोजणी फी’ अभावी हे रस्ते खुले होण्यास अडचणी येत होत्या. जिल्ह्यातील सर्व तालुक्यांमध्ये मोठ्या प्रमाणात वहिवाट रस्ते, ग्रामीण रस्ते, हद्दीचे रस्ते खुले करण्याची अनेक प्रकरणे प्रलंबित आहे. रस्ते खुले करण्यासाठी काही प्रकरणांमध्ये मोजणी फी कोणी भरायची यावरूनसुद्धा प्रकरणे प्रलंबित आहेत.

या पार्श्‍वभूमीवर जिल्हाधिकारी जितेंद्र डुडी यांनी एक परिपत्रक काढून तहसीलदार यांनी मोजणी करून रस्ते खुले करण्याकरिता गावनिहाय नियोजन करावी. याची कल्पना भूमिअभिलेख व पोलिस निरीक्षक यांना देण्यात यावी, अशा सूचना दिल्या आहेत.

अतिक्रमित रस्ते होणार मोकळे

तालुक्यातील पायमार्ग तुटक रेषेने दर्शविलेले असून, या पायमार्गाची रुंदी सव्वा आठ फूट इतकी निश्‍चित आहे. तर गाडी मार्गाची रुंदी १६.५ ते २१ फुटांपर्यंत निश्‍चित केलेली आहे. त्यानुसार असे अतिक्रमित रस्ते मोकळे करण्यात येणार आहे.