Ratnagiri News : मागील वर्षीच्या तुलनेत जिल्ह्यात जूनमध्ये चांगला पाऊस झाला. त्यामुळे यंदा भातशेतीची कामे वेळेत सुरू होतील आणि वेळेत पूर्ण होतील, अशी बळीराजाला आशा आहे. जूनमध्ये सरासरी ८०० मिमी पावसाची नोंद होते. गतवर्षी सरासरी ५५० मिमी पाऊस झाला होता. यंदा तो ९९७ मिमीपर्यंत पाऊस झाला. यंदा आतापर्यंत ४ हजार हेक्टर क्षेत्रावर भात रोप लागवड पूर्ण झाली आहे.

जूनच्या पहिल्या आठवड्यात जोरदार पाऊस झाला. परंतु दुसऱ्या आठवड्यात हुलकावणी दिली. कडकडीत ऊन पडल्यामुळे पेरणीच्या कामात अडथळे आले होत. ज्या भागात पाणी उपलब्ध होते, तेथील भात रोपवाटिकांची पेरणी पूर्ण झाली.

मात्र उर्वरित ठिकाणी पावसाची प्रतीक्षा करावी लागली. पुन्हा पाच दिवसांच्या विश्रांतीनंतर पावसाला सुरुवात झाली. त्यामुळे उर्वरित पेरणीची कामे पूर्ण झाली. जिल्ह्यात ६८ हजार हेक्टर क्षेत्रावर भात रोप लागवड करावयाची आहे. यंदा चांगला पाऊस पडल्यामुळे आतापर्यंत ४ हजार हेक्टरवर लागवड केली.

जिल्ह्यात सर्वाधिक पाऊस मंडणगड तालुक्यात १ ते ४ जुलै या कालावधीत ९९७ मिमी पावसाची नोंद झाली. त्यात चिपळूण तालुक्यात सर्वाधिक १११३ मिमी पावसाची नोंद झाली आहे. सर्वांत कमी पाऊस राजापूर तालुक्यात ८७६ मिमी झाला आहे. दापोली, चिपळूण, रत्नागिरी व लांजा तालुक्यांनी हजारी पार केली.