Nagpur News : शेतीपूरक पशुपालन व्यवसाय हा आर्थिक भरभराटीचे निमित्त ठरतो. त्यामुळेच शेतकऱ्यांनी पशुपालनासाठी पुढे येत या क्षेत्रातील अडचणींवर सांघिकरित्या मात करण्याची गरज असल्याचे मत हैदराबाद येथील राष्ट्रीय मांस संशोधन संस्थेचे संचालक डॉ. सुखदेव बारबुद्धे यांनी व्यक्‍त केले.

महाराष्ट्र पशु व मत्स्य विज्ञान विद्यापीठ तसेच भारतीय कृषी संशोधन परिषदेअंतर्गंत असलेल्या मांस संशोधन संस्थेच्या संयुक्‍त सहकार्याने आयोजीत कार्यशाळेत ते बोलत होते.

पशुपालन क्षेत्रातील संधी आणि आव्हाने या विषयावर नागपूर पशुवैद्यक महाविद्यालयात ही कार्यशाळा पार पडली. डॉ. बारबुद्धे म्हणाले, की शेतीत पुरुष राबत असतील तर महिलांनी घरीच शेळीपालन, कुक्‍कुटपालन केले पाहिजे.

अशा शेतीपूरक व्यवसायातून चांगला पैसा मिळतो. यावेळी त्यांनी मांसलकामी उपयोगी येणाऱ्या पशूंची उपयुक्‍त माहिती दिली. पशुपालनाद्वारे स्वयंरोजगार निर्मितीचे उद्दिष्ट साधण्याचा सल्लाही दिला.

माफसूचे विस्तार शिक्षण संचालक डॉ. अनिल भिकाने, मांस संशोधन संस्थेचे तज्ज्ञ डॉ. बस्वा रेड्डी, सह्योगी अधिष्ठाता डॉ. आरजू सोमकुवर, आयोजन सचिव डॉ. विजय बसुनाथे उपस्थित होते.