Jalgaon News : राज्य शासनाच्या मुख्यमंत्री माझी लाडकी बहीण योजनेचा लाभ जिल्ह्यातील सुमारे साडेआठ लाख महिला घेत आहेत. यात एक लाखावर महिला या योजनेचे पोर्टल बंद असल्याने अर्ज सादर करू शकत नाहीत.

२१ ते ६५ वर्षे वयाच्या महिलांना या योजनेतून लाभ दिला जातो. यात अनेक युवती २१ वर्षे वयोगटावरील आहेत. या युवतीदेखील या योजनेत पोर्टल बंद असल्याने अर्ज करू शकत नाहीत. त्यांनाही लाभ मिळत नाही.

यातच या योजनेचा लाभ घेण्यासंबंधी अर्ज करण्याची १५ ऑक्टोबर २०२४ ही अखेरची मुदत होती. यानंतर योजनेचे पोर्टल बंद आहे. या योजनेत सहभागासाठी अर्ज दाखल करण्यास मुदतवाढ मिळावी, अशी मागणी सतत केली जात आहे.

आधार अपडेट होईना

आधार अपडेट किंवा अद्ययावत करण्याची प्रक्रिया अलीकडे क्लिष्ट व वेळखाऊ झाली आहे. नावात दुरुस्ती करण्यासाठी आता बारकोडयुक्त मतदान कार्ड, पासपोर्ट आदी कागदपत्रांची मागणी केली जाते. मतदान कार्ड अनेक महिलांकडे बारकोडयुक्त नसल्याने अडचणी आल्या. यामुळे महिलांना प्रथम मतदान कार्ड अपडेट करावे लागते.

कारण कमाल महिलांकडे पासपोर्ट नाहीत. यात १५ ते २० दिवस गेले. यानंतर आधार अपडेट करण्यासाठी अर्ज केला. यात काही महिलांचे अर्ज आधारच्या पोर्टलवरून फेटाळण्यात आले. योग्य पुरावा दिलेला नसल्याचा दावा त्यात सबब म्हणून करण्यात आला.

यामुळेही महिलांना नाहक त्रास झाला. दोन-दोन वेळेस आधार अपडेट करण्यासाठी अर्ज करावे लागले. आधार अपडेटअभावी योजनेत अनेक महिला अर्ज सादर करू शकल्या नाहीत. अशा महिलांसाठीदेखील पोर्टल सुरू करून अर्ज स्वीकारण्याची प्रक्रिया सुरू करण्याची मागणी केली जात आहे.