Akola News : खानदेशात आढळून आलेल्या कुकुंबर मोझॅक व्हायरस रोगाचा (सीएमव्ही) अकोला जिल्ह्यातील केळी बागांमध्येही प्रादुर्भाव दिसून आला आहे. जुलै-ऑगस्टमध्ये लागवड केलेल्या बागांमध्ये आता १० ते १२ टक्क्यांदरम्यान प्रादुर्भावग्रस्त झाडे बघायला मिळत आहेत.

जिल्ह्यात पणज हे केळी उत्पादनासाठी माहेरघर बनलेले आहे. तेल्हारा, अकोट, बार्शीटाकळी या तालुक्यांत केळीचे उत्पादन घेतले जाते. त्यात प्रामुख्याने सातपुड्याच्या पायथ्याशी असलेल्या अकोट, तेल्हारा तालुक्यांत हजारो एकरांवर केळी आहे. या हंगामातही नव्याने मोठ्या प्रमाणात लागवड झाली आहे. पाऊस उशिरा आल्याने केळीची लागवड जुलै-ऑगस्टमध्ये झाली. या बागांमध्ये ‘सीएमव्ही’ रोगाचा प्रादुर्भाव दर दिवसाला वाढू लागला आहे. केळीची पाने लाल, पिवळी होत आहेत.

वाढीवर परिणाम दिसू लागला आहे. यावर काहीही उपाय केले तरी फायदा होत नसल्याचा अनुभव शेतकरी सांगत आहेत. इतर पिकांच्या तुलनेत केळीला समाधानकारक दर मिळत असल्याने अकोटमध्ये केळीचे क्षेत्र वाढत आहे. या वर्षी सुमारे १० लाखांवर रोपांची या भागात लागवड झालेली आहे. या लागवडीला कुठे दोन महिने, कुठे दीड महिना लोटला. याच काळात हा रोग बागांमधील झाडांवर दिसू लागला. यामुळे झाडांची अपेक्षित वाढ होऊ शकलेली नाही.