Jalgaon News : फळ पीकविमा योजनेतून जिल्ह्यातील केळी पिकासाठी विमा संरक्षण घेतलेल्या सर्व ७७ हजार ८१० शेतकऱ्यांना तत्काळ परतावे मिळावेत, केळी पीक पडताळणी बाबतचा शासन व प्रशासनाने घेतलेला निर्णय मागे घेतला जावा, आदी मागण्यांसाठी शेतकरी संघर्ष समितीतर्फे रावेर (जि. जळगाव) येथे मंगळवारी (ता. ३) मोर्चा काढण्यात आला.
अनेक शेतकरी या मोर्चात सहभागी झाले. सकाळी रावेर शहरातील डॉ. बाबासाहेब आंबेडकर चौकात मोर्चास सुरुवात झाली. पीकविमा आमच्या हक्काचा नाही कोणाच्या बापाचा, कुकुंबर मोझॅक विषाणू (सीएमव्ही) समस्येतून केळीचे नुकसान झाल्यास पात्र विमाधारकांना यासंबंधीदेखील विमा योजनेतून परतावे किंवा नुकसानभरपाई मिळावी आदी मागण्या करण्यात आल्या. यानंतर रावेर शहरातील अंकलेश्वर - बऱ्हाणपूर राज्यमार्गावर रास्ता रोको आंदोलन करण्यात आले. रास्ता रोको आंदोलन सुमारे २५ मिनिटे करण्यात आले.
शहरातील पूर्ण वाहतूक यामुळे खोळंबली. वाहतूक सुरळीत करण्यासाठी पोलिसांना कसरत करावी लागली. यानंतर पोलिस व प्रशासनातील मंडळीने शेतकऱ्यांची समजूत काढली व आंदोलन मागे घेण्यात आले.
मोर्चात रघुनाथदादाप्रणीत शेतकरी संघटनेचे किरण गुर्जर, उमेश पाटील, सचिन पाटील, स्वप्नील पाटील, रितेश पाटील, श्रीकांत चौधरी, शशांक पाटील, धीरज पाटील, रमेश पाटील, लीलाधर पाटील आदी सहभागी झाले.
राष्ट्रवादी काँग्रेसचे जिल्हाध्यक्ष रवींद्र पाटील, माजी मंत्री गुलाबराव देवकर, वाल्मीक पाटील यांनी देखील केळीचे खांब घेऊन जिल्हाधिकारी कार्यालयात दाखल होत सर्व ७७ हजार केळी विमाधारकांना लवकर परतावे दिले जावेत, अशी मागणी केली.
ॲग्रोवनचे सदस्य व्हा
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.