Mumbai News: राज्यातील शाळामध्ये हिंदी भाषा सक्तीची केल्याचा निर्णय राज्य सरकारने रद्द केल्यानंतर त्याचे श्रेय घेण्यावरून सत्ताधारी आणि विरोधी पक्षाच्या नेत्यांनी विधानभवन पायऱ्यावर सोमवारी अधिवेशनाच्या पहिल्या दिवशी आंदोलन केले.

विधानभवनाच्या पायऱ्यांवर सोमवारी (ता.३०) सत्ताधारी आणि विरोधी पक्षांनी एकत्र येऊन हिंदी सक्तीच्या शासन निर्णयाविरोधात तीव्र आंदोलन केले.

मराठी भाषेच्या संरक्षणासाठी आणि हिंदी भाषा लादण्याच्या निर्णयाविरोधात सत्ताधारी आणि विरोधी आमदारांनी एकजुटीने आवाज उठवला. ‘मराठीचा जागर, हिंदी सक्ती नाही चालणार’ अशी घोषणा देत विरोधी पक्षांनी सरकारवर दबाव वाढवला.

महाविकास आघाडीतील शिवसेना (उद्धव बाळासाहेब ठाकरे), काँग्रेस आणि इतर घटक पक्षांनी तसेच सत्ताधारी गटातील काही आमदारांनीही या आंदोलनात सहभाग घेतला. आंदोलनादरम्यान, विधानभवनाच्या पायऱ्यांवर टाळ वाजवून आणि फलक झळकावून विरोधकांनी निदर्शने केली, तर सत्ताधारी आमदारांनीही मराठीच्या समर्थनार्थ घोषणाबाजी केली.

विरोधकांच्या आंदोलनाला विरोध करत सत्ताधाऱ्यांनी उद्धव ठाकरे यांना डिवचण्याचा प्रयत्न केला. ‘कम ऑन किल मी’ असा फलक घेत उपरोधिक आंदोलन केले.