Sangli Chana Online Registration : सांगली जिल्ह्यात पणन हंगामामध्ये केंद्र शासनाने निश्चित केलेल्या आधारभूत दरानुसार 'नाफेड' तर्फे हरभरा खरेदी करण्यात येणार आहे. हरभरा खरेदीसाठी शासनाच्या - सूचनेनुसार शेतकऱ्यांची 'एनईएमएल' पोर्टलवर ऑनलाईन नोंदणी २८ मार्चपासून सुरू झाल्याचे जिल्हा पणन अधिकारी सी. डी. खाडे यांनी सांगितले.

सांगली जिल्ह्यात विष्णुअण्णा खरेदी विक्री संघ (सांगली), अॅड. आर. आर. पाटील शेतकरी सहकारी संघ (तासगाव) येथील केंद्रावर ऑनलाइन नोंदणी प्रक्रिया सुरू झाली आहे.

किमान आधारभूत किंमत योजनेनुसार ज्यांना वरील ठिकाणी हमीभाव खरेदी केंद्रावर हरभरा विक्री करावयाची आहे, अशा शेतकऱ्यांची ऑनलाइन नोंदणी करणे आवश्यक आहे.

चालू हंगामातील हरभरा पिकाचा 'पीक पेरा' ऑनलाइन नोंद असलेला अद्ययावत मूळ ७/१२ उतारा, बँक खात्याच्या पासबुकची साक्षांकित प्रत, आधारकार्ड प्रत, तसेच शेतकऱ्याचा मोबाईल क्रमांक आदी आवश्यक आहे.

हंगाम २०२३-२४ साठी केंद्राने हरभरा पिकासाठी ५ हजार ४४० रुपये प्रतिक्विंटल हमीभाव जाहीर केला आहे. ज्यांना त्यांचा हरभरा हमीभाव खरेदी केंद्रावर विक्री करावयाचा आहे, अशांनी मुदतीत नोंदणी करावी, असे आवाहन खाडे यांनी केले आहे.