Nashik News : केंद्र शासनाकडून कांदा निर्यातीवर वेळोवेळी लादण्यात येणाऱ्या प्रतिबंधांमुळे कांदा उत्पादक शेतकरी व व्यापाऱ्यांना येणाऱ्या अडचणी येतात. त्यामुळे कांद्याचे कायमस्वरूपी निर्यात धोरण ठरविण्यासाठी शासन दरबारी येत्या पावसाळी अधिवेशनात आवाज उठविणार आहे.

हा प्रश्न कायमस्वरूपी मार्गी लावण्यासाठी शासन स्तरावर प्रयत्न करणार असल्याचे प्रतिपादन सावनेर-कळमेश्वर विधानसभा मतदार संघाचे आमदार डॉ.आशिष देशमुख यांनी केले.

जिल्ह्यातील शेतकऱ्यांनी केलेली विविध पिकांची लागवड, उत्पादन, प्रक्रिया, निर्यात तसेच शेतीमाल विक्री व्यवस्था आदी विषयांवर माहिती जाणून घेण्यासाठी आमदार डॉ. देशमुख यांनी मतदार संघातील शेतकरी प्रतिनिधींसह नाशिक जिल्हा दौरा केला.

दरम्यान, लासलगाव कृषी उत्पन्न बाजार समितीस भेट दिली. या वेळी शिष्टमंडळाने कांदा लिलावात भेट देऊन बाजार समितीचे सदस्य, शेतकरी, व्यापारी यांच्याकडून कांदा लागवडीचा हंगाम, निविष्ठा, उत्पादन, उत्पादन खर्च, शेतमाल विक्री व्यवस्था तसेच निर्यात याबाबत माहिती जाणून घेऊन घेतली. यावेळी बाजार समितीचे सभापती ज्ञानेश्वर जगताप, उपसभापती संदीप दरेकर उपस्थित होते.

याप्रसंगी सदस्य जयदत्त होळकर, छबुराव जाधव, सुवर्णा जगताप, डॉ.श्रीकांत आवारे, तानाजी आंधळे, प्रविण कदम, रमेश पालवे, सचिव नरेंद्र वाढवणे, सचिन होळकर, लासलगांव ग्रामपंचायतीचे सदस्य चंद्रशेखर होळकर, बबन शिंदे, ऐश्वर्या जगताप, रूपा केदारे, सहसचिव प्रकाश कुमावत, सहाय्यक सचिव सुशिल वाढवणे आदी उपस्थित होते.