Nanded News : जिल्ह्यात शुक्रवारी (ता. ८) नांदेड, लोहा, मुदखेड, अर्धापूर तालुक्यांमध्ये जोरदार पाऊस झाला. इतर तालुक्यात मात्र मध्यम स्वरूपाची नोंद झाली. जिल्ह्यात मागील चोवीस तासांत सरासरी १०.२० मिलिमीटर पाऊस नोंदवण्यात आला आहे. नांदेड तालुक्यातील तरोडा मंडलात ६५.३० मिलिमीटर झाल्यामुळे या ठिकाणी अतिवृष्टीची नोंद झाली आहे.

नांदेड जिल्ह्यात जिल्ह्यात मागील दोन दिवसांपासून पावसाने सुरुवात केली आहे. हा पाऊस जिल्ह्याच्या अनेक भागात होत आहे. गुरुवारी जिल्ह्यातील पाच मंडलात अतिवृष्टी झाली होती. यानंतर शुक्रवारीही जिल्ह्याच्या अनेक भागात पाऊस झाला.

हा पाऊस नांदेड, लोहा, मुदखेड, अर्धापूर तालुक्यांमध्ये जोरदार होता. पावसाचा जोर अधिक असल्याने नांदेडमधील तरोडा मंडलात ६५.३० मिलिमीटर पावसाची नोंद झाल्यामुळे या ठिकाणी अतिवृष्टी झाली आहे.

यासोबतच नांदेड शहर मंडलात ५७.५, नांदेड ग्रामीण ६१.५०, लिंबगाव ३६.३०, विष्णुपुरी ३८.५०, नाळेश्‍वर ४७.३०, उस्माननगर २९, लोहा २९, सोनखेड २९, कलंबर २९, मुगट ३३.८०, बारड ३३.५०, दाभड ६१.५०, मालेगाव ३८.३० मिलिमीटर पाऊस झाला. मागील चोवीस तासात जिल्ह्यात सरासरी १०.२० मिलिमीटरच नोंद झाली आहे. शुक्रवारचा सर्वाधीक नांदेड, अर्धापूर आणि नायगाव (खु.) तालुक्यात झाला.

तर काही तालुक्यांमध्ये अजूनही पावसाची प्रतीक्षा आहे. हवामान विभागाकडून पुढील काही दिवसांत जिल्ह्यात हलक्या ते मध्यम स्वरूपाच्या पावसाचा अंदाज वर्तविण्यात आला आहे.

तालुकानिहाय पावसाचा तपशील (मिमीमध्ये)

नांदेड ३९.४०, बिलोली ५.५०, मुखेड ०.४०, कंधार ७.१०, लोहा २०.७०, हदगाव ८.७०, भोकर १.७०, देगलूर ०.४०, किनवट शुन्य, मुदखेड २५.४०, हिमायतनगर ०.३०, माहूर शून्य, धर्माबाद शून्य, उमरी ९.१०, अर्धापूर ३९.८०, नायगाव ६.८०.