Pune News : देशाच्या ग्रामीण विकासात राष्ट्रीय कृषी व ग्रामीण विकास बॅंकेने (नाबार्ड) गेल्या चार दशकांत बजावलेली भूमिका मैलाचा दगड ठरली आहे. तसेच, ग्रामीण अर्थकारणाला चालना देणाऱ्या धोरणांचे प्रतिबिंब नाबार्डच्या कामात दिसून येतेे, असे गौरवोद्गगार केंद्रीय अर्थ सचिव एम. नागाराजू यांनी काढले.

‘नाबार्ड’चा ४४ वा स्थापना दिन चेन्नईत उत्साहात साजरा करण्यात आला. या वेळी ते बोलत होते. तमिळनाडूचे मुख्य सचिव एम. मुरुगनंदन, नाबार्डचे अध्यक्ष के. व्ही. शाजी, उपव्यवस्थापकीय संचालक जी. एस. रावत, ए. के. सूद तसेच देशाच्या बॅंकिंग क्षेत्रातील मान्यवर उपस्थित होते.

श्री. नागाराजू म्हणाले, ‘हवामान बदलाची आव्हाने व डिजिटल क्षेत्रातील संधी यातून आपली वाटचाल चालू आहे. परंतु, देशाच्या ग्रामीण लोकजीवनाला अधिक समृद्ध करण्यात इतर कोणत्याही संस्थेपेक्षा नाबार्डची भूमिका यापुढेही मोलाची ठरणार आहे.

’ श्री. शाजा म्हणाले, की देशाच्या कृषी पतपुरवठ्यात, ग्रामीण विकासात तसेच डिजिटल अर्थक्रांतीत नाबार्डची वाटचाल उपयुक्त ठरली. आता ग्रामीण भागाच्या उद्यमशीलतेला चालना व शाश्वत विकासाला प्रोत्साहन देण्याची भूमिका नाबार्डची राहील.

तमिळनाडूचे मुख्य सचिव श्री. मरुगनंदन यांनी, स्वयंसहायता गट, पायाभूत सुविधा व वित्तपुरवठा क्षेत्रात नाबार्डने केलेल्या योगदानाचे कौतुक केले. या वेळी नाबार्डच्या विविध उपक्रमांचा प्रारंभ व पुस्तकांचे प्रकाशन करण्यात आले.