Solapur News : महावितरणमार्फत बसविण्यात येणाऱ्या टीओडी (टाइम ऑफ डे) मीटरमुळे ग्राहकांना त्यांच्या वीज वापराची माहिती दर तासानुसार (रियल टाइम) उपलब्ध होणार आहे.

त्यामुळे ग्राहकांचे त्यांच्या वीज वापरावर व पर्यायाने वीजबिलावर नियंत्रण राहणार आहे. टीओडी मीटर हे ग्राहकांच्या फायद्याचेच असून, ग्राहकांनी अफवांना बळी पडू नये, असे आवाहन महावितरणने केले आहे.

हे अद्ययावत मीटर बसविल्याने महावितरणची वाणिज्यिक हानी कमी होणार आहे. तसेच वीजचोरीवर नियंत्रण येणार आहे. त्यामुळे होणाऱ्या महसूल वाढीतूनच टीओडी मीटरचा खर्च भागविण्यात येणार आहे.

टीओडी मीटरमधून वापरल्या जाणाऱ्या प्रत्येक युनिटची रिअल टाइम माहिती ही ग्राहकास मोबाइलवर उपलब्ध होणार आहे. त्यामुळे वीज वापरानुसार रीडिंग येत नसेल, तर ग्राहकास हे कळणार आहे.

बसवण्यात येणारे टीओडी मीटर हे राष्ट्रीय मानांकन प्राप्त लॅबमधून चाचणी केलेले असल्याने ग्राहकांना वापरा इतकेच वीजबिल मिळणार आहे. अत्यंत नावीन्यपूर्ण अशी पारदर्शी सुविधा वीज ग्राहकांना नव्या टीओडी मीटरमुळे मिळणार आहे.