MNS protest : लातूर जिल्ह्यात पावसाने २१ दिवसांपासून उघडीप दिल्याने पिकांनी माना टाकल्या आहेत. पिके वाळून चालल्याने शासनाने जिल्ह्यात कोरडा दुष्काळ जाहीर करावा. या मागणीसाठी आक्रमक होत मनसेने शुक्रवारी (ता. १८) जिल्हाधिकारी कार्यालयासमोर निदर्शने केली.

कोरडा दुष्काळ जाहीर करून शेतकऱ्यांना हेक्टरी एक लाख रुपयांची मदत जाहीर करावी, अशी मागणी मनसेचे सरचिटणीस तथा शेतकरी सेनेचे प्रदेशाध्यक्ष संतोष नागरगोजे यांनी केली. या आठवड्यात जर शासनाने दुष्काळ जाहीर नाही केला, तर मंत्र्यांना जिल्ह्यात फिरू देणार नाही, असा इशारा श्री नागरगोजे यांनी दिला. आंदोलनाची सांगता जिल्हाधिकारी यांना विविध मागण्यांचे निवेदन देऊन करण्यात आली.  या आंदोलनात जिल्हाध्यक्ष डॉ. नरसिंह भिकाणे, शिवकुमार नागराळे, संजय राठोड, भागवत शिंदे, मनोज अभंगे, रवी सूर्यवंशी, सचिन सिरसाट, प्रीती भगत, किरण चव्हाण, अंकुश शिंदे आदींसह कार्यकर्ते सहभागी झाले होते.

प्रमुख मागण्या...

•   लातूर जिल्ह्यात कोरडा दुष्काळ जाहीर करा  

•   मनमानी करणाऱ्या पीकविमा कंपन्यांना काळ्या यादीत टाका

•   पीकविम्याची २५ टक्के अग्रिम रक्कम तत्काळ द्यावी

•   बोगस बियाणे शेतकऱ्यांना विकणाऱ्या कंपन्यांवर कडक कारवाई करावी

•   खत, बियाण्यांची लिंकिंग करण्यावर कारवाई करा

•   चढ्यादराने खत, बियाण्याची विक्री करणाऱ्या कृषी निविष्ठा केंद्रावर करावी करा

•   गोगलगाय व इतर रोगांमुळे झालेल्या नुकसानीचे त्वरित पंचनामे करा