Solapur News : मंगळवेढा तालुक्यातील दुष्काळी भागातील गावांचा आमदार प्रणिती शिंदे यांनी गावभेट दौरा केला. या दौऱ्यामध्ये पिण्याच्या पाण्याचे टँकर व जनावरांच्या चारा छावणीबाबतच्या समस्या जाणून घेतल्या. तसेच शेतकऱ्यांच्या अन्य अडचणींबाबतही त्यांच्याशी त्यांनी संवाद साधला.

मंगळवेढा तालुक्यातील अनेक गावांमध्ये टँकर व जनावरांकरिता चारा छावणी चालू करण्याबद्दल मागणी होत आहे, त्या पार्श्वभूमीवर आमदार शिंदे यांनी जिल्हाधिकाऱ्यांकडे मागणी केली. दौऱ्याच्या सुरुवातीलाच काही गावांतील मराठा समाजाने आरक्षणप्रश्नी विरोध केला, मात्र नंतर या दौऱ्यात त्यांना प्रतिसाद पाहायला मिळाला.

मंगळवेढ्यातील दुष्काळी भागातील पाठकळ-मेटकरवाडी, खडकी, नंदेश्वर, भोसे, महमदाबाद हुन्नूर, लोणार, पडोळकरवाडी, रेवेवाडी, मानेवाडी, हुन्नूर, मारोळी, चिक्कळगी, शिरनांदगी, रड्डे, सिद्धनकेरी, जालीहाळ, हाजापूर या गावांना त्यांनी भेटी दिल्या. या गावांमध्ये पिण्याच्या पाण्याची व जनावरांकरिता चाऱ्याची भीषण टंचाई निर्माण झालेली पाहायला मिळाली.

या वेळी आमदार शिंदे म्हणाल्या, की सोलापूर जिल्ह्यातील एकमेव विरोधी पक्षाची मी आमदार आहे. आजपर्यंत इतर कोणाच्याही मतदार संघात हस्तक्षेप केला नाही. पण मंगळवेढा तालुक्याच्या दुष्काळग्रस्तांच्या अडचणी ज्या वेळी समोर आल्या, त्या वेळी आपल्या पद्धतीने सोडविण्यासाठी प्रयत्न केला आणि यापुढेही करत राहणार असे सांगितले.

दरम्यान, नागरिकांच्या विविध प्रश्नांवर त्यांनी संबंधित अधिकारी आणि जिल्हाधिकाऱ्यांना फोन लावून समस्या सोडविण्याची मागणी केली. या वेळी त्यांच्यासमवेत ज्येष्ठ नेते शिवाजीराव काळुंगे, तालुका अध्यक्ष प्रशांत साळे, नंदकुमार पवार, अभिजित पाटील, मनोज यलगुलवार, विनोद भोसले, रविकिरण कोळेकर, पांडुरंग जावळे आदी उपस्थित होते.