Pune News : जुन्नर तालुक्यातील वडज धरणांच्या पाणलोट क्षेत्रातील निरगुडे व बेलसर येथील मीना नदीचे पात्र कोरडे पडले आहे. या परिसरातील शेतकऱ्यांच्या शेतीच्या व पिण्याच्या पाण्याचा प्रश्न गंभीर बनला आहे.

या परिसरातील सुराळे, बोतार्डे, आमलेवाडी, बेलसर, खानगाव, निरगुडे या गावांमधील शेतकरी हैराण झालेत. जनावरांच्या पिण्याच्या पाण्याचा व चाऱ्याचा प्रश्न गंभीर झाल्याने जनावरे जगवायची कशी, असा प्रश्न उभा राहिला आहे.

ऐन पावसाळ्यात मीना नदीच्या खोऱ्यात मुसळधार पाऊस पडतो. या भागात पडलेल्या पावसाचे पाणी वडज धरणात साठविले जाते. तर घंगाळदरे, भिवाडे, उच्छिल आंबोली या लघु धरणांमध्ये देखील पाण्याचा साठा केला जातो.

या पाण्यावर या भागातील निरगुडे, बेलसर, बोतार्डे, सुराळे, राळेगण, खानगाव, आदी गावांतील शेती अवलंबून आहे. सध्या नदी पात्र कोरडे झाले आहे. विहिरींनी देखील तळ गाठला आहे. उन्हाळी बाजरीचे पीक जळून चालली आहेत. तर पिण्यासाठी देखील पाणीटंचाईचा नागरिकांना सामना करावा लागत आहे.

‘समस्येकडे कुणीही लक्ष देत नाही’

खानगावच्या हद्दीत दुसरा केटी वेयर बांधल्यास या भागातील नागरिकांच्या पिण्याच्या पाण्यासह शेतीच्या पाण्याचा प्रश्न निकाली निघेल, मात्र या समस्येकडे कुणीही लक्ष देत नसल्याची खंत उपसरपंच सुभाष कामटकर यांनी व्यक्त केली.