Palghar News : पालघर जिल्ह्यातील पाच तालुक्यांमध्ये औषधी गुणधर्म असलेल्या काळ्या तिळाची लागवड केली जाते. यंदाच्या रब्बी हंगामात काळ्या तिळाची लागवड ६४४ हेक्टर क्षेत्रात करण्यात आली आहे. पाच तालुक्यांपैकी पालघरमध्ये सर्वाधिक ३८५ हेक्टर, तर विक्रमगडमध्ये १४० हेक्टर क्षेत्रात तिळाची लागवड करण्यात आली आहे.

संपूर्ण राज्यात काळ्या तिळाचे उत्पादन घेणारा पालघर जिल्हा असून, सर्वाधिक लागवड पालघर तालुक्यात केली जाते. पेरणी आणि मशागत खर्च अत्यल्प असल्याने खरीप हंगाम संपताच तिळाच्या पेरणीकडे शेतकरी वळतात. सूर्या आणि वैतरणा नदी काठच्या चिकन मातीत काळ्या तिळाची लागवड केली जाते.

जिल्ह्यात रब्बी हंगामात हरभरा, तूर, भुईमूग, कुळीथ आदी पिके घेतली जातात. तीळ लागवडीच्या क्षेत्रात वाढ करण्यासाठी कृषी विभागाकडून प्रयत्न सुरू आहेत. सूर्या आणि वैतरणा नदी किनारच्या बहाडोली, दहिसरतर्फे मनोर, कुडे, चहाडे, सागावे, गिरनोली, लालठाणे, तांदूळवाडी, पारगावसह इतर काही गावांमध्ये गेल्या ३० ते ४० वर्षांपासून तिळाची लागवड केली जाते.

सुरुवातीला १०० ते १२५ हेक्टर असलेले पालघर तालुक्यातील तीळ लागवडीचे क्षेत्र ३८५ हेक्टरहून अधिक क्षेत्रापर्यंत पोहोचले आहे. उत्पादित काळ्या तिळापासून घरगुती वापरासाठी तेल तयार करण्यापलीकडे शेतकरी लक्ष देत नसल्यामुळे लागवड क्षेत्र वाढत नसल्याचे बोलले जाते.

सरकारकडून प्रोत्साहन

तिळाची लागवड करताना शेतकऱ्यांनी नवनवीन प्रयोग करून उत्पादन वाढवण्याची गरज आहे. कृषी विभाग प्रयत्नशील असताना शेतकऱ्यांकडून तीळ लागवडीकडे फारसे गांभीर्याने पाहिले जात नाही.

वैतरणा आणि सूर्या नदीलगतच्या शेतीत काळ्या तिळाची लागवड केली जात असून, तिळाच्या औषधी गुणधर्मामुळे मोठ्या प्रमाणात मागणी असूनही उत्पादनाकडे लक्ष देण्यात आले नाही. कृषी विभागाकडून केंद्र आणि राज्य सरकारच्या विविध कार्यक्रमअंतर्गत शेतकऱ्यांना तीळ लागवडीसाठी प्रोत्साहन दिले जात आहे.