Jalgaon News : खानदेशात तीळ पेरणी पुढील महिन्यात सुरू होणार आहे. पेरणी यंदाही अल्प किंवा अपेक्षेएवढी होणार नाही, अशी स्थिती आहे. पेरणी केळी पट्ट्यात बेवडसाठी बऱ्यापैकी राहील, असे चित्र आहे.
आगाप तीळ पेरणी सुरू झालेली नाही. पुढील आठवड्यात काही भागात पेरणी होणार आहे. तीळ पिकाची पेरणी खानदेशात मागील १५ ते १८ वर्षांपासून सतत कमी झाली आहे. पूर्वी तीळ पिकाची पेरणी १२ ते १३ हजार हेक्टरवर केली जात होती.
जेवढी पेरणी खरिपात केली जायची, तेवढीच पेरणी रब्बीतही शेतकरी करायचे. तीळ पिकासाठी जळगाव जिल्ह्यातील चोपडा, यावल, रावेर, अमळनेर, पाचोरा, जामनेर हा भाग प्रसिद्ध होता. धुळ्यातील शिरपूर, शिंदखेडा, नंदुरबारातील तळोदा, शहादा, नंदुरबार भागातही तीळ पेरणीला शेतकरी पसंती द्यायचे. परंतु कमी दर, अल्प उत्पादन यामुळे पेरणी कमी होत गेली.
यंदा खानदेशात सुमारे दीड हजार हेक्टरवर तीळ पेरणी अपेक्षित होती. परंतु पेरणी ७०० ते ८०० हेक्टरवरच होईल, असे दिसत आहे. तिळाचे दर स्थिर किंवा चांगले आहेत. खरिपात उत्पादन कमी होते. अनेक खरेदीदार, कारखानदारांना तीळ अन्य राज्यांतून मागवावी लागते. तीळ दर मागील वर्षभरापासून १४ हजार रुपये प्रतिक्विंटलच्या खाली आलेले नाहीत. काही बाजार समित्यांत तिळाला १५ हजार रुपये प्रतिक्विंटलचा दरही मिळाला होता.
तिळाची आवक अल्प असल्याने दर टिकून आहेत. या दरांचा लाभ मिळावा व केळी, अन्य पिकांसाठी बेवड मिळावे, फेरपालट व्हावी यासाठी काही शेतकरी तीळ पेरणी करत आहेत. जळगाव जिल्ह्यातील चोपडा, यावल, रावेर, जळगाव, नंदुरबारातील शहादा, तळोदा, नंदुरबार या भागांत तीळ पेरणी होणार आहे.
धुळ्यातील शिरपूर तालुक्यातही काही भागात तीळ पेरणी सुरू होणार आहे. जळगाव जिल्ह्यात सुमारे ५०० ते ५५० हेक्टरवर तीळ पेरणी होईल, अशी अपेक्षा आहे. तर धुळे व नंदुरबारात मिळून सुमारे २०० ते २५० हेक्टरवर तीळ पेरणी होईल, असे दिसत आहे. पेरणीसाठी अधिक गाळपक्षमता, वजनदार आणि कमी कालावधीत येणाऱ्या वाणांची निवड केली जात आहे.
जमीन सुपीकतेला मदत
तीळ पिकाची पेरणी काळ्या कसदार जमिनीत अधिकची केली जात आहे. काळ्या कसदार जमिनीत तिळाचे उत्पादन एकरी दोन क्विंटलपेक्षा अधिक मिळते, असेही शेतकरी मानतात. कमी खर्च व कमी पाण्यात काळ्या कसदार जमिनीत तीळ पीक साध्य करणे शक्य आहे. अशा जमिनीत केळी लागवडीसाठी तीळ पिकाचे बेवड असल्यास पीक जोमदार येते, असेही शेतकऱ्यांचे म्हणणे आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.