Nashik News : देवळा बाजार समितीच्या कार्यक्षेत्रात असलेल्या निंबोळा परिसरात उपबाजार आवराची निर्मिती व्हावी, अशी मागणी गेल्या तीन ते चार वर्षांपासून होती. तर बाजार समितीच्या पंचवार्षिक निवडणुकीत संचालक मंडळाने निंबोळा येथे उपबाजार आवार सुरू करण्याचे आश्वासन दिले होते.

त्यानुषंगाने सोमवारी (ता. ११) उपबाजार आवाराचा प्रारंभ केला. कांदा व मक्याचे येथे लिलाव सुरू करण्यात आले. उन्हाळा कांद्याला मुहूर्ताला प्रतिक्विंटल ३,००१ रुपये तर मक्याला २,३०० रुपये दर मिळाल्याची माहिती बाजार समितीकडून देण्यात आली.

कसमादे भाग कांदा व मका उत्पादनात पुढे आहे. हीच बाजू अभ्यासून बाजार समितीने येथे शेतीमाल लिलाव सुरू केले आहेत. पहिल्याच दिवशी येथे उन्हाळ कांद्याची ७,००० क्विंटलपर्यंत आवक झाली.

कांद्याला किमान ५००, कमाल ३,००१, तर सरासरी १,६०० रुपये प्रतिक्विंटल दर मिळाला. तर मक्याची आवक पहिल्याच दिवशी शंभर क्विंटल झाली. त्यास सरासरी २,३०० रुपये दर मिळाल्याची माहिती सचिव माणिक निकम यांनी दिली.

लिलाव प्रारंभप्रसंगी सभापती योगेश आहेर यांनी प्रास्ताविक केले. दरम्यान, निंबोळा येथील प्रगतिशील शेतकरी जव्हार निकम यांच्या कांद्याला सर्वाधिक ३,००१ रुपये व लखमापूरच्या सोनू बच्छाव यांच्या कांद्याला २,००१ रुपये प्रतिक्विंटल दर मिळाला. याप्रसंगी उपसभापती अभिमन पवार, संचालक भाऊसाहेब पगार, दादाजी आहिरे, दिलीप पाटील,

माजी संचालक जितेंद्र आहेर, सरपंच प्रदीप निकम, शरद ठाकरे, सोसायटीचे उपाध्यक्ष हिरामण आहिरे, उपसरपंच नितीन निकम, पंडितराव निकम, अशोक थोरात, केदा शिरसाट, किरण पाटील, शिवाजी चव्हाण, जगदीश पवार, कैलास देवरे, संजय गायकवाड, सचिव माणिक निकम, कांदा व्यापारी, कर्मचारी, कांदा उत्पादक शेतकरी उपस्थित होते. कैलास निकम यांनी सूत्रसंचालन केले.