Latur News : छत्रपती संभाजीनगर विभागीय महसूल आयुक्त दिलीप गावडे यांनी शेतकऱ्यांच्या जिव्हाळ्याचा शेत, शिव व पाणंद रस्त्याचा विषय ऐरणीवर घेतला आहे. त्यांनी सुरू केलेल्या संवाद मराठवाड्याशी या उपक्रमाच्या दुसऱ्या टप्पात बुधवारी (ता. १६) दुपारी चार वाजता ते शेतरस्त्याच्या विषयावर मराठवाड्याच्या आठ जिल्ह्यातील गरजू शेतकऱ्यांसोबत संवाद साधणार आहेत.

ऑनलाइन वेबिनारद्वारे हा संवाद असणार आहे. या संवादात शेतकऱ्यांना क्यूआर कोड तसेच मीटिंग आयडी व पासकोडच्या साह्याने सहभागी होता येणार आहे. याचा शेतकऱ्यांनी मोठ्या संख्येने लाभ घ्यावा, असे आवाहन श्री. गावडे यांनी केले आह.

शेतरस्ते, पाणंद रस्ते व शिवरस्ते हे शेतकऱ्यांच्या अत्यंत जिव्हाळ्याचे विषय आहे. शेतरस्ता हा शेतकऱ्याच्या प्रगतीचा मार्ग असून, औसा विधानसभा मतदारसंघात आमदार अभिमन्यू पवार यांनी शेतरस्त्याचा पॅटर्न तयार केला आहे. आमदार पवार सोडले तर या विषयाकडे कोणत्याही लोकप्रतिनिधींचे विशेष असे लक्ष नाही.

अधिकाऱ्यांनाही रस्त्याचा वादाचा विषय नकोसा आहे. मात्र विभागीय आयुक्त गावडे यांनी आपल्या उपक्रमाच्या दुसऱ्याच टप्प्यात हा विषय ऐरणीवर घेतल्यामुळे त्याचा अनेक शेतकऱ्यांना लाभ होण्याची आशा आहे. मराठवाडा विभागातील आठही जिल्ह्यातील गरजू नागरिक आपल्या शेतातील जाण्या-येण्याच्या रस्त्याबाबत अडचणी घेऊन विभागीय आयुक्त कार्यालयात प्रशासकीय अधिकारी यांच्या भेटीसाठी, निवेदने देण्यासाठी येतात.

मात्र विभागीय पातळीवरील अधिकारी अनेकदा कामानिमित्त दौऱ्यावर किंवा अन्य कामामुळे त्यांची भेट होत नाही, हीच बाब विचारात घेत गरजू नागरिकांशी ऑनलाइन वेबिनारद्वारे विभागीय आयुक्त गावडे थेट संवाद साधणार आहे. जे रस्ते अस्तित्वात आहेत त्यांना क्रमांक देण्यात यावेत. शेतजमिनीमध्ये वहिवाट करण्यासाठी अस्तित्वात असलेले रस्ते काही ठिकाणी अरुंद आहेत. अशा ठिकाणी मोठी वाहने जाण्यास अडचण निर्माण होऊन तक्रारही होतात.

राज्यातील सर्वच शिवपाणंद आणि शेतरस्त्यांची हद्द निश्चित करून त्यांची कामे दर्जेदाररीत्या पूर्ण करावी, शेतरस्ते बंद करणाऱ्यांवर महसूल प्रशासनामार्फत योग्य ती कार्यवाही करावी, शेत वहिवाट रस्त्याची तक्रार सुनावणी तहसीलदार यांच्याकडे होते. अशी रस्त्यांबाबत प्रलंबित असलेली प्रकरणे एका महिन्यात निकाली काढावीत, असे आदेश महसूलमंत्री चंद्रशेखर बावनकुळे यांनी दिले आहेत. त्यानुसारच या संवादाचे आयोजन केल्याचे गावडे यांनी सांगितले.

शिवरस्ते, पाणंद रस्ते याबाबत संवाद

Wednesday April 16, 15:45 - 18:00

https://us06web.zoom.us/j/83997100847?pwd=v1dSQaZXJrLlq41F3Wgo6MAZNJxfNy.1

Meeting ID: 839 9710 0847

Passcode: 073227

महसूलमंत्री चंद्रशेखर बावनकुळे यांनी दिलेल्या आदेशाच्या अनुषंगाने गरजू शेतकऱ्यांच्या अडचणी जाणून घेणे, त्यांचे निराकरण करण्यासाठी विभागातील सर्व निवासी उप जिल्हाधिकारी आणि तहसीलदार यांच्या उपस्थितीत सर्व गरजू शेतकऱ्यांशी या वेबिनारच्या माध्यमातून चर्चा आणि अडचणीचे निराकरण करण्यात येणार आहे.

याबाबतचा क्यूआर कोडही प्रसिद्ध करण्यात येत आहे. गरजू नागरिकांना आपल्या मोबाइलद्वारे या उपक्रमात सहभागी होता येणार आहे. तरी विभागातील सर्व गरजू शेतकऱ्यांनी यामध्ये सहभागी व्हावे, असे आवाहन विभागीय आयुक्त गावडे यांनी केले आहे.