Jalgaon News : खानदेशात अनेक शेतकऱ्यांना महात्मा फुले कर्जमुक्ती योजनेचा लाभ मिळालेला नाही. यातील अनेक शेतकऱ्यांना राज्य शासनाकडून अपलोड झालेली माहिती ग्राह्य न धरली गेल्याने या योजनेपासून वंचित राहावे लागले आहे.

खानदेशात सुमारे दोन लाख शेतकऱ्यांना या योजनेचा लाभ मिळाला. नंतर कोरोना व इतर संकटे आली व या योजनेची कार्यवाही संथ झाली. सरकार बदलले. महायुतीकडे सत्ता आली. निधीची अडचण, तांत्रिक अडचण आदी कारणे बँका शेतकऱ्यांना सांगत आहेत. तसेच आम्ही आपल्या कर्जाची, आपण पात्र असल्याची माहिती संबंधित पोर्टलवर अपलोड केली आहे.

परंतु ती स्वीकारली जात नसल्याने किंवा अंतिम मंजुरी मिळत नसल्याने कर्जमुक्ती योजनेचा लाभ मिळत नसल्याचे बँकांचे म्हणणे आहे. अपलोड केलेली माहिती राज्य शासनाच्या संबंधित यंत्रणेकडून स्वीकारली (अॅकसेप्ट) केली जाते. ही कार्यवाही झाल्यानंतर शासनाकडून संबंधित कर्जदार शेतकऱ्याच्या बँक खात्यात कर्जाचा निधी जमा केला जातो.

यानंतर संबंधित शेतकरी कर्जमुक्त होतो. परंतु ही कार्यवाही केली जात नसल्याचे सांगितले जात आहे. जळगाव जिल्ह्यात सुमारे सात हजार व धुळे, नंदुरबारात सुमारे सहा हजार शेतकरी या योजनेपासून वंचित आहेत.

तसेच सुमारे एक लाख नियमीत कर्जदार शेतकरी 50 हजार रुपये प्रोत्साहन अनुदानापासून वंचित आहेत. यामुळे शेतकऱ्यांमध्ये रोष आहे. जे शेतकरी पात्र असून, यादीत नाव असूनही, काही कारणांनी कर्जमुक्त झालेला नाहीत, त्यांना नव्याने पीक कर्ज मिळत नसल्याची स्थिती आहे. तसेच बँकाही कर्जमुक्तीचे पत्र (नील दाखला) देत नाहीत. यामुळे संबंधित शेतकऱ्यांची अधिकची अडचण होत आहे.