Farmer Loan Waive : शेतकऱ्यांना संपूर्ण कर्जमाफी द्या

Shirpur News : शेतकऱ्‍यांना संपूर्ण कर्जमाफी द्यावी, १२ हजार पात्र वनहक्क जमीनधारकांना कापूस व सोयाबीनच्या नुकसानापोटी हेक्टरी पाच हजार रुपये अनुदान द्यावे, जातीनिहाय जनगणना त्वरित सुरु करुन आरक्षणाची ५० टक्क्यांची मर्यादा उठवावी, या प्रमुख मागणीसाठी येथील भारतीय कम्युनिस्ट पक्ष आणि सहयोगी संघटनांतर्फे शुक्रवारी (ता.३०) येथील प्रांताधिकारी कार्यालयावर मोर्चा काढण्यात आला.

भाकपसह महाराष्ट्र राज्य किसान सभा, लालबावटा शेतमजूर युनियन, आशा व गटप्रर्वतक संघटनेच्या वतीने मोर्चाचे आवाहन केले होते. यावेळी किसान सभेचे प्रदेशाध्यक्ष अ‍ॅड.हिरालाल परदेशी, भाकपचे तालुका सचिव अ‍ॅड. संतोष पाटील, ज्येष्ठनेते अर्जुन कोळी, किसान सभेचे जिल्हाध्यक्ष सतीलाल पावरा, नारसिंग पावरा, रामचंद्र पावरा आदींनी सरकारच्या नाकर्तेपणावर संताप व्यक्त केला.

राज्य सरकार पुन्हा सत्तारुढ होण्यासाठी शासकीय तिजोरी रिकामी करीत आहे. शेतमालासाठी हमीभावाचा कायदा नाही. विमा कंपन्या शेतकरी आणि सरकारची लूट करीत आहेत. शेतमालाचे नुकसान नुकसान सुरु असतांना सरकार बघ्याची भूमिका घेत आहे.

वनजमिनीचा अद्यापही सातबारा दिला जात नाही. नाशिकच्या अप्पर आयुक्तांकडील बरेच वनदावे फेटाळण्यात आले आहेत. आशा व गटप्रर्वतकांना हक्काचे मानधन मिळत नाही. , असे आरोप करण्ययात आले. त्यानंतर मोर्चाच्या शिष्टमंडळातर्फे प्रशासनाला निवेदन देण्यात आले. यावेळी पोलिसांनी मोठा बंदोबस्त ठेवला होता.