Jalgaon News: खानदेशात ‘केवायसी’अभावी अनेर शेतकऱ्यांना अनुदान मिळू शकत नसल्याची स्थिती आहे. केवायसीअभावीची प्रक्रिया पूर्ण करा व अनुदानाचा लाभ घ्या, असे आवाहन प्रशासनाने केले आहे.

जळगाव जिल्ह्यात नैसर्गिक आपत्तीपोटी प्राप्त झालेली २९९ कोटी रुपये नुकसान भरपाई केवायसीअभावी शेतकऱ्यांना मिळू शकलेली नाही. सुमारे दोन हजारांवर शेतकऱ्यांनी केवायसी केलेली नसल्याची माहिती आहे.

यामुळे प्रशासन हे अनुदान संबंधित लाभार्थींना देऊ शकत नाही. केवायसीची प्रक्रिया संबंधित शेतकऱ्यांनी पूर्ण करावी, असे आवाहन प्रशासनाने अनेकदा केले आहे. ई-केवायसी न केल्यास लाभाची रक्कम किंवा निधी संबंधित शेतकऱ्यांच्या बँक खात्यात जमा होत नसल्याची स्थिती आहे.

या कामासाठी संबंधित तालुका कृषी सहायक, तालुका कृषी अधिकारी कार्यालय किंवा आपले सरकार सेवा केंद्रात संपर्क करावा, असे आवाहन करण्यात आले आहे. धुळे व नंदुरबार जिल्ह्यांतही २०२२ मध्ये काही भागांत अतिवृष्टी किंवा अधिक पाऊस झाला होता. त्यात घरगोठ्यांसह शेतीची हानी झाली होती.

या भागातही सुमारे अडीच हजारांवर शेतकऱ्यांना केवायसीअभावी नुकसान भरपाईची रक्कम मिळू शकलेली नसल्याची माहिती मिळाली. अनेक शेतकऱ्यांच्या बोटांचे ठसे केवायसी प्रक्रियेत येत नाहीत. यामुळे अडचण येत आहे.

काही शेतकऱ्यांनी आधार अपडेट केलेले नाही, याचाही फटका बसला आहे. वृद्ध, सतत शेतात कष्ट करणाऱ्या शेतकऱ्यांना बोटांचे ठसे व अन्य बाबींत अडचणी आल्याची माहिती आहे. यात आधार अपडेट करण्यासाठी गेल्यास आधार केंद्रात दोन ते तीन तास थांबावे लागते.

मोठी गर्दी तेथे असते, यामुळे वृद्ध, रूग्ण शेतकऱ्यांना अडचणी येत असल्याची माहिती मिळाली. मागील कालावधीत जळगाव जिल्ह्यात नैसर्गिक आपत्तीमुळे २०२२ मध्ये मोठी हानी झाली. दोन लाख ६३ हजार शेतकऱ्यांना याचा फटका बसला.

त्यात चाळीसगाव, मुक्ताईनगर व पाराळो तालुक्यांत अधिकची हानी झाली. या हानीसंबंधी प्रशासनाने पंचनामे केले व भरपाईसाठी अहवाल पाठविला होता. यासंबंधी शेतकऱ्यांना नुकसान भरपाईची रक्कमही शासनाने दिली.