Nanded News : मुखेड, माहूर, बिलोली, कुंडलवाडी, लोहा व उमरी येथील कृषी उत्पन्न बाजार समितीचा निकाल रविवारी घोषित झाला. लोहा येथील बाजार समिती निवडणुकीत महाविकास आघाडीने सर्वाधिक जागा जिंकून खासदार प्रताप पाटील चिखलीकर यांना जबरदस्त धक्का दिला आहे.

माहूरमध्ये भाजप आणि काँग्रेसचा धुव्वा उडून राष्ट्रवादी आघाडीने बाजी मारली आहे. तर बिलोली, कुंडलवाडी, उमरीतही महाविकास आघाडी सत्तेत आली आहे.

जिल्ह्यातील मुदत संपलेल्या सहा बाजार समितीची निवडणूक जिल्ह्यात शनिवारी (ता. ७) झाली. या निवडणुकीचा निकाल रविवारी (ता. ८) जाहीर झाला.

यात मुखेड येथील बाजार समितीच्या १८ जागांपैकी १७ जागांवर भाजप व मित्र पक्षाने विजय मिळविला आहे. केवळ १ जागा महाविकास आघाडीला मिळाली आहे. माहूर येथे भाजप, काँग्रेसच्या पॅनेलला ४ तर राष्ट्रवादीने १४ जागा मिळविल्या.

बिलोली येथे काँग्रेस व मित्र पक्षाला १७ जागा मिळाल्या तर भाजप महायुतीला एका जागेवर समाधान मानावे लागले. कुंडलवाडी येथे महाविकास आघाडीच्या पॅनेलला १७ तर महाविकास आघाडीला केवळ १ जागा मिळाली.

लोहा येथे महाविकास आघाडीने सर्वाधिक १६ जागा मिळवल्या. खासदार प्रताप पाटील चिखलीकर यांना केवळ २ जागांवर समाधान मानावे लागले. तर उमरी येथे महाविकास आघाडीला १८ जागा मिळाल्याने भाजपला पराभवाचा सामना करावा लागला.