Ahilyanagar News: सोशल मीडियाच्या आक्रमणामुळे मैदाने ओस पडत आहेत. तरुण पिढीला पुन्हा मैदानाकडे वळवण्यासाठी महाराष्ट्र केसरी कुस्ती स्पर्धेचा उपक्रम उपयुक्त ठरेल. कुस्ती क्षेत्राला राजकीय पाठबळ असणे आवश्यक आहे. छत्रपती शाहू महाराजांनंतर कुस्तीला एवढे मोठे राजकीय पाठबळ मिळण्यासाठी हा उपक्रम महत्त्वाचा असेल याचे मत पद्मश्री पोपटराव पवार यांनी व्यक्त केले.

अहिल्यानगर येथे महाराष्ट्र केसरी कुस्ती स्पर्धेला बुधवारी (ता. २९) सुरुवात झाली. या वेळी श्री. पवार बोलत होते. या प्रसंगी जिल्हाधिकारी सिद्धाराम सालीमठ, जिल्हा पोलिस अधीक्षक राकेश ओला, जिल्हा परिषदेचे मुख्याधिकारी, आयुक्त यशवंत डांगे, माजी आमदार अरुण जगताप, आमदार संग्राम जगताप, संपत बारस्कर, हिंदकेसरी योगेश दोडके, महाराष्ट्र केसरी गुलाब बर्डे, अशोक शिर्के, सईद चाऊस त्यांच्यासह राज्यभरातील पदाधिकारी कुस्तीप्रेमी उपस्थित होते.

श्री. पवार पुढे म्हणाले, की महाराष्ट्र केसरी कुस्ती स्पर्धेसाठी अतिशय भव्य दिव्य आयोजन आमदार संग्राम जगताप यांनी करून दाखविले आहे. त्यामुळे ही अतिशय उत्कृष्ट व सुंदर स्पर्धा नगरमध्ये होत आहे.

वाडिया पार्क मैदानाचा कायापालट करण्याचा संकल्प केला आहे. सर्वात मोठे क्रीडा संकुल येथे करण्याचा आमचा प्रयत्न आहे. या कुस्ती स्पर्धेत शासकीय स्तरावरील सर्व सहकार्य करत आहे. प्रास्ताविक जिल्हा सचिव डॉ. संतोष भुजबळ यांनी केले. खजिनदार शिवाजी चव्हाण यांनी आभार मानले. आमदार संग्राम जगताप म्हणाले, की महाराष्ट्रात सर्वांत लोकप्रिय असलेली महाराष्ट्र केसरी कुस्ती स्पर्धा अहिल्यानगरला होत असल्याचा सर्वाधिक आनंद आहे.