Prayagraj Shahi Snan : प्रयागराज येथे सुरू असलेल्या कुंभमेळ्यात आज (ता.२९) महत्वाचा दिवस आहे. यामुळे कुंभमेळ्याच्या ठिकाणी लाखो भाविकांची गर्दी झाल्याने चेंगराचेंगरीची घटना घडली आहे. यामध्ये प्रयागराजमधील त्रिवेणी संगम परिसरात रात्री १ च्या सुमारास हा प्रकार घडला. या घटनेत १० हून अधिकांचा मृत्यू झाला आहे. तर ४० पेक्षा जास्त भाविक जखमी झाल्याची प्राथमिक माहिती समोर आली आहे. जखमींना जवळच्या रुग्णालयात दाखल करण्यात आलं आहे. तर उत्तरप्रदेशचे मुख्यमंत्री घटनास्थळी दाखल झाले आहेत. तर पंतप्रधान नरेंद्र मोदी यांनी फोनवरून प्रयागराज येथील घटनेचा आढावा घेतला आहे.

मौनी अमावस्येच्या दिवशी दुसऱ्या शाही स्नानासाठी प्रयागराजमध्ये जोरदार तयारी करण्यात आली होती. त्यामुळे भाविकांनी मध्यरात्री त्रिवेणी संगमावर मोठी गर्दी केली. यावेळी अपेक्षेपेक्षाही जास्त भाविकांची मोठी गर्दी झाली. या चेंगराचेंगरीत काहींनी बॅरिकेट तोडल्याने लोक एकमेकांच्या अंगावर पडले यात शेकडो लोक एकमेकांच्या अंगावर दाबले गेले. १० जणांचा मृत्यू झाला तर ४० हून अधिक जखमी झाले आहेत.

याबाबत उत्तरप्रदेश प्रशासनाकडून अद्यापही याची पुष्टी करण्यात आली नाही. या घटनेनंतर रुग्णवाहिका तत्काळ घटनास्थळी दाखल झाल्या आणि जखमींना रुग्णालयात दाखल करण्यात आलं. काही मिनिटांतच पोलिसांनी या ठिकाणी परिस्थिती नियंत्रणात आणली.

कुंभमेळ्याचे अधिकारी आकांक्षा राणा म्हणाले की, ''त्रिवेणी संगमाजवळ चेंगराचेंगरीसारखी स्थिती निर्माण झाली होती. काही बॅरिकेट तुटले. एकाच ठिकाणी मोठी गर्दी निर्माण झाल्यानं हा प्रकार घडला. जखमींना आम्ही रुग्णालयात दाखल केलं आहे. त्यांच्यावर उपचार सुरू आहेत. यात कुणीही गंभीर जखमी नाही'', अशी माहिती कुंभमेळ्याच्या अधिकारी आकांक्षा राणा यांनी दिली.

दरम्यान, या घटनेनंतर आता आखाडा परिषेदेने आज होणारे शाही स्नान उशिरा घेण्याचे ठरवले आहे. ''चेंगराचेंगरीच्या घटनेनंतर आम्ही आज शाही स्नान उशिरा करण्याचा निर्णय घेतला आहे. संपूर्ण कुंभमेळा परिसरात लाखो भाविक आले आहेत. या पार्श्वभूमीवर आजचे स्नान उशिरा होईल. अशी माहिती आखाडा परिषदेचे अध्यक्ष रवींद्र पुरी यांनी दिली.

काल सायंकाळपर्यंत आम्ही या शाही स्नानाची योग्य व्यवस्था केली होती. मात्र, एकाच वेळी मोठी गर्दी झाल्याने चेंगराचेंगरी झाली. यामुळे आज होणारे शाही स्नान साध्या पद्धतीने उशिरा होणार असल्याची माहिती आखाडा परिषदेने दिली.

पंतप्रधान मोदींनी या घटनेनंतर उत्तर प्रदेशचे मुख्यमंत्री योगी आदित्यानाथ यांच्याशी फोनवरून चर्चा करत परिस्थितीचा आढावा घेतला. तसेच योग्य त्या उपाययोजना करण्याच्या सुचना दिल्या. केंद्रीय गृहमंत्री अमित शहा यांनीही योगी आदित्यनाथ यांच्याशी चर्चा केली. केंद्र सरकार या घटनेकडे लक्ष ठेऊन असल्याचं सांगण्यात आले.