Hingoli News : हळदीच्या वाणांचे शुद्ध बेणे शेतकऱ्यांना लागवडीसाठी उपलब्ध करून देण्यासाठी ‘महाबीज’ यंदा प्रायोगिक तत्त्वावर प्रमाणित हळद बेणे उत्पादन घेण्याच्या विचारात आहे. त्याअनुषंगाने आवश्यक बाबींची चाचपणी केली जात आहे.

गुरुवारी (ता. १५) महाबीजचे व्यवस्थापकीय संचालक योगेश कुंभेजकर यांनी वसमत येथील बाळासाहेब ठाकरे हरिद्रा (हळद) संशोधन केंद्रास भेट दिली. या वेळी आयोजित बैठकीत हळद बेणे उत्पादनाच्या दृष्टीने आवश्यक महत्त्वपूर्ण बाबींवर चर्चा करण्यात आली.

या वेळी महाबीजचे महाव्यवस्थापक (उत्पादन) विवेक ठाकरे, महाव्यवस्थापक (गुणवत्ता व संशोधन) डॉ. प्रफुल्ल लहाने, परभणी विभागीय व्यवस्थापक डी. डी. कान्हेड, हिंगोलीचे जिल्हा अधीक्षक कृषी अधिकारी तथा बाळासाहेब ठाकरे हळद संशोधन केंद्राचे व्यवस्थापकीय संचालक राजेंद्र कदम, विभागीय बीज प्रमाणीकरण अधिकारी विजय सिराळ (अकोला), भालचंद्र वाघ (परभणी), जिल्हा प्रमाणीकरण शरद कदम, आर. व्ही. जगदाळे, हळद संशोधन केंद्राचे तंत्र अधिकारी रमेश देशमुख, पर्यवेक्षक रमाकांत भुरे, तंत्र सहाय्यक पंकज कदम आदी उपस्थित होते.

कुंभेजकर म्हणाले, की यंदा प्रायोगिक तत्त्वांवर हळद बेणे उत्पादनाची तयारी केली जात आहे. त्यासाठी विविध ठिकाणच्या हळद संशोधन केंद्रांकडून पैदासकार बेणे घेतले जाईल. कंद किंवा रोपे लागवड करून बेणे उत्पादन घेण्याचे नियोजन आहे. हळद बेणे उत्पादन धोरण निश्‍चित केले जाईल. पैदासकार बेण्याच्या उपलब्धतेबाबत हळद संशोधन केंद्रांकडे विचारणा करावी, अशी सूचना कुंभेजकर यांनी केली.

ठाकरे म्हणाले, की हळदीच्या सेलम वाणाच्या बेणे उत्पादनाचा विचार आहे. उत्पादकता तसेच कुरकुमीनचे प्रमाण अधिक असलेल्या इतर वाणांच्या लागवडीच्या अनुषंगाने शेतकऱ्यांमध्ये जाणीवजागृती करावी लागेल.

या वेळी बीज प्रमाणीकरण यंत्रणेत हळद बेणे मानांकनासाठी हळदीच्या प्रमाणित बेणे उत्पादनाची गरज आहे. प्रमाणित बेणे उत्पादनातून हळदीच्या वाणांची ओळख निर्माण होईल, अशी माहिती देण्यात आली. दरम्यान, कुंभेजकर यांनी हळद संशोधन केंद्राच्या प्रक्षेत्रावर उत्पादित बेणे, कंदापासून रोपे निर्मिती आदीची माहिती घेतली.