Solapur News : डाळिंबाचा जिल्हा म्हणून सोलापूरची एक विशेष ओळख आहे. परंतु मागील काही वर्षापासून डाळिंबावर पडणारे विविध रोग व त्यातून कमी दर्जाचे पीक आल्याने भाव न मिळल्यामुळे सोलापूर जिल्ह्यातील शेतकरी डाळिंब पिकापासून दूर जात असल्याचे चित्र आहे.

ही परिस्थिती बदलण्यासाठी व शेतकरी पुन्हा डाळिंब पिकाकडे आकर्षित होऊन जिल्ह्याला डाळिंब पिकात गतवैभव प्राप्त व्हावे, यासाठी डाळिंब उत्पादनात नवतंत्रज्ञानाचा वापर प्रभावीपणे करण्यात येणार असल्याची माहिती जिल्हाधिकारी कुमार आशीर्वाद यांनी दिली.

जिल्हाधिकारी कुमार आशीर्वाद यांनी केगाव (ता. उत्तर सोलापूर) येथील राष्ट्रीय डाळिंब संशोधन केंद्राला भेट देऊन डाळिंब पिकावर व त्यातील नवतंत्रज्ञानावर संशोधन करणाऱ्या शास्त्रज्ञांशी चर्चा केली.

यावेळी राष्ट्रीय डाळिंब संशोधन केंद्राचे प्रमुख शास्त्रज्ञ श्री. मराठे, जिल्हा अधीक्षक कृषी अधिकारी दत्तात्रय गावसाने, आत्माचे प्रकल्प संचालक मदन मुकणे यांच्यासह अन्य शास्त्रज्ञ उपस्थित होते. पाकणी येथील डाळिंब पिकविणारे शेतकऱ्यांच्या शेतावर जाऊन जिल्हाधिकारी आशीर्वाद यांनी डाळिंब पिकाच्या परंपरागत लागवड पद्धतीची माहिती जाणून घेतली.

यावेळी त्यांनी संबंधित शेतकऱ्यांशी डाळिंब पिकाच्या अनुषंगाने सविस्तर चर्चा करून क्षेत्र वाढविण्यासाठी त्यांना प्रोत्साहित केले. तसेच क्षेत्रवाढीसाठी प्रशासनाच्या वतीने योग्य नियोजन करण्यात येईल, असेही त्यांनी सांगितले. यावेळी जिल्हा अधीक्षक कृषी अधिकारी दत्तात्रय गावसाने, प्रकल्प संचालक आत्मा मदन मुकणे, तालुका कृषी अधिकारी अतुल पवार व भूसेवा शेतकरी उत्पादक कंपनीचे सर्व संचालक उपस्थित होते.