Akola News: ऑक्टोबर महिन्यात झालेल्या पावसामुळे लिंबू बहराला फटका बसला. त्यानंतर धुक्यामुळे काही बहर गळाल्याने यंदा बागांमध्ये झाडांवर लिंबांची संख्या अत्यंत कमी आहे. बहर फुटला नसल्याने बाजारात कमी आवक होत आहे. परिणामी यंदा फेब्रुवारी महिन्यातच लिंबाचा दर पाच हजार रुपयांपर्यंत गेला आहे. येत्या काळात यात आणखी मोठ्या वाढीचा कल दिसून येत असल्याचे शेतकरी व खरेदीदारही सांगत आहेत.

अकोला जिल्ह्यात वाडेगाव ही लिंबासाठी मोठी बाजारपेठ आहे. जिल्ह्यात लिंबाची लागवड तीन ते चार हजार हेक्टरपर्यंत असल्याने या ठिकाणी स्थानिक मालाची आवक मोठी होत असते. सध्या या बाजारात एक टनापर्यंतही आवक होत नसल्याचे खरेदीदार सांगत आहेत.

उन्हाळ्याची चाहूल लागताच दर वर्षी लिंबाला मागणी वाढू लागते. यंदा बागांमध्ये बहर फुटलेला नसल्याचा फटका उत्पादनावर झाला आहे. बाजारात लिंबाची मागणी वाढत असतानाच स्‍थानिक भागातील पुरवठा जेमतेम होत आहे. पाच ते सात क्विंटलपर्यंत लिंबे विक्रीसाठी येत असल्याचे खरेदीदार सांगत आहेत. हाच माल स्थानिक छोटे विक्रेते खरेदी करून बाजारांमध्ये विक्री करीत आहेत. पुरेशी लिंबे नसल्याने बाहेरचे व्यापारी आतापर्यंत खरेदीसाठी येथे आलेले नाहीत. किमान महिनाभरानंतर आवकेत बदल होईल अशी आशा आहे.

मागणीत वाढ
लग्नसराई तसेच उन्हाळ्याची चाहूल लागल्याने लिंबाला मागणी वाढत आहे. खास करून विविध खाद्य उद्योग, रसवंती उद्योगात आणि घरगुती वापरकर्त्यांमध्येही लिंबाचा वापर वाढू लागला. परिणामी ठोक बाजार पाच हजारांवर पोहोचला. तर अनेक किरकोळ विक्रेत्यांनी देखील किमतीत वाढ केली आहे. किरकोळ लिंबूविक्री किलोला ८० रुपयांपर्यंत होत आहे.

ठळक
-ऑक्टोबरच्या पावसाने बागांच्या बहर फुटण्यावर विपरीत परिणाम
-बाजारात मागणी वाढू लागली
- लिंबाची आवक तुलनेने कमीच
- हवामान बदलाचे लिंबू उत्पादकांना चटके