Parbhani News: वसंतराव नाईक मराठवाडा कृषी विद्यापीठाने विकसित केलेल्या कपाशीच्या ३ सरळ वाणांच्या बीटी बियाण्याचे लोकार्पण मुख्यमंत्री देवेंद्र फडणवीस यांच्या हस्ते गुरुवारी (ता. २९) ‘जॉइंट ॲग्रेस्को’च्या उद्‍घाटन कार्यक्रमात करण्यात आले. कपाशीचे सरळ वाण बीटीमध्ये परिवर्तीत करून शेतकऱ्यामंध्ये प्रसारित करणारे ‘वनामकृवि’ हे राज्यातील पहिले कृषी विद्यापीठ आहे.

या वेळी कृषिमंत्री माणिकराव कोकाटे, राज्यमंत्री अशिष जैयस्वाल, पालकमंत्री मेघना साकोरे-बोर्डीकर, खासदार संजय जाधव, कुलगुरू डॉ. इंद्र मणी, संशोधन संचालक डॉ. खिजर बेग आदी उपस्थित होते. ‘वनामकृवि’च्या नांदेड येथील कापूस संशोधन केंद्राने बीटीमध्ये परिवर्तीत केलेले एनएच १९०१ बीटी, एनएच १९०२ बीटी, एनएच १९०४ बीटी ही तीन कपाशीचे अमेरीकन सरळ वाण आहेत.

या वाणांचे बियाणे यंदा शेतकऱ्यांना खरेदीसाठी उपलब्ध करून देण्यात आले. वाण हे सरळ वाण रसशोषण करणाऱ्या किडी, जीवाणूजन्य करपा, पानावरील ठिपके या रोगांकरिता सहनशील आहेत. कोरडवाहू लागवडीमध्ये मध्य भारतामधील विविध केंद्रांवर या वाणांच्या उत्पादनामध्ये सातत्य आढळून आले आहे.

या वाणाचा रुईचा उतारा ३५ ते ३७ टक्के असून यांचे धाग्याची लांबी मध्यम, मजबुती व तलमपणा सरस आहे. या वाणांची मध्य भारतातील महाराष्ट्र, गुजरात व मध्य प्रदेश या राज्यांत लागवडीकरिता शिफारस करण्यात आली आहे.

उत्कृष्ट कृषी संशोधक पुरस्कार

मुख्यमंत्री देवेंद्र फडणवीस यांच्या हस्ते ‘जॉइंट ॲग्रेस्को’मध्ये राज्यातील चारही कृषी विद्यापीठांतील संशोधन कार्यात उत्कृष्ट कामगिरी करणाऱ्या शास्त्रज्ञांचा ‘उत्कृष्ट कृषी संशोधक पुरस्कार २०२५’ दैऊन गौरव करण्यात आला.

त्यात ‘वनामकृवि’चे डॉ. मदन पेंडके, महात्मा फुले कृषी विद्यापीठाचे डॉ. सुनील कदम, ‘पंदेकृवि’चे डॉ. संतोष गहुकर, बाळासाहेब सावंत कोकण कृषी विद्यापीठाचे डॉ. विजय दळवी यांचा सन्मान करण्यात आला.