Kolhapur News : गगनबावडा, पन्हाळा व करवीर या तीन तालुक्यांतील सुमारे ५४ गावांना सुजला सुफला करणाऱ्या कुंभी मध्यम प्रकल्पांत १२ फेब्रुवारीअखेर ८१ टक्के पाणीसाठा शिल्‍लक आहे.

तालुक्यातील उर्वरित ३ लघू पाटबंधारे प्रकल्पांत ७० ते ७६ टक्क्यांपर्यंत पाणीसाठा शिल्‍लक आहे. तालुक्यातील पाटबंधारे प्रकल्पामध्ये शिल्‍लक असलेला पाणीसाठा पिण्यासह सिंचनासाठी ३० जूनअखेर पुरेल, असे नियोजन पाटबंधारे विभागाने केले आहे.

गगनबावडा तालुक्यात लखमापूर येथील कुंभी या प्रमुख मध्यम प्रकल्पासह अणदूर, कोदे व वेसरफ हे लघू पाटबंधारे प्रकल्प येतात. पावसाचे आगार असलेल्या गगनबावडा तालुक्यात चालूवर्षी झालेल्या पावसाने तालुक्यातील सर्वच प्रकल्प पूर्ण क्षमतेने भरले.

तालुक्यातील कुंभी मध्यम प्रकल्पाची पाणी साठवण क्षमता २.७१ टीएमसी आहे. १२ फेब्रुवारीअखेर तालुक्यातील अणदूर लघू प्रकल्पात ४.०१ दलघमी (६९.७४ टक्के), कोदे लघू प्रकल्‍पात ४.६४ दलघमी (७६.५७ टक्के), वेसरफ लघू प्रकल्पात २.४५ दलघमी (७२.७० टक्के) तर कुंभी मध्यम प्रकल्पात ६२.११ दलघमी (८०.७९ टक्के) पाणीसाठा शिल्लक आहे.

५४ गावांतील पिकांचा आधार

गगनबावड्यासह पन्‍हाळा व करवीर या तीन तालुक्‍यांतील सुमारे ५४ गावांतील ८ हजार ७११ हेक्टरमधील पिके सिंचनासाठी या प्रकल्पावर अवलंबून आहेत. या प्रकल्पातील पाणी कुंभी नदीत सोडले जाते. बॅक वॉटर पद्धतीने कळे बंधाऱ्यातून या प्रकल्पाचे पाणी धामणी नदीत सोडावे लागते.