Sangli News : राज्य शासनाने राज्यातील ४० दुष्काळी तालुक्यांची यादी जाहीर केली. त्यात सांगली जिल्ह्यातील कायम दुष्काळी जत तालुक्याला वगळण्यात आले आहे. त्याबद्दल संताप व्यक्त करत प्रहार शेतकरी संघटनेच्या कार्यकर्त्यांनी जत तहसीलदारांची गाडी फोडली. बुधवारी (ता. १) तहसीलदार कार्यालयाच्या आवारात हा प्रकार घडला. त्यामुळे एकच गोंधळ उडाला.

सांगली जिल्ह्यात दहा तालुके आहेत. त्यापैकी शिराळा, मिरज, कडेगाव आणि खानापूर या तालुक्यांचा समावेश दुष्काळी म्हणून करण्यात आला. अत्यंत तीव्र दुष्काळी स्थिती असलेल्या जत, आटपाडी तालुक्यांसह तासगाव, कवठेमहांकाळ तालुक्यांचा यात समावेश नाही. जतचा समावेश व्हावा यासाठी लोकप्रतिनिधींनीही आंदोलन केले होते. जिल्हाधिकारी डॉक्टर राजा दयानिधी यांनी या तालुक्यांचा दुष्काळी यादीत समावेश करावा, असा नव्याने प्रस्ताव राज्य शासनाकडे दाखल केला आहे. त्याबाबत अद्याप निर्णय झालेला नाही.

दरम्यान, शासनाने मध्यम दुष्काळी तालुक्यांची यादी जाहीर केली. जिल्ह्यातील शिराळा, मिरज, कडेगाव, आणि खानापूर या तालुक्यांचा मध्यम दुष्काळी यामध्ये समावेश करण्यात आला आहे. दरम्यान जिल्ह्यातील जत, आटपाडी, तासगाव आणि कवठेमहांकाळ हे चार तालुके दुष्काळात समाविष्ट न झाल्याने शेतकऱ्यांच्या मधून तीव्र संताप होत असताना जत तालुक्यातील प्रहार शेतकरी संघटनेच्या कार्यकर्त्यांनी जत तहसीलदारांची गाडी फोडली.

वास्तविक जत, आटपाडी, तासगाव आणि कवठेमहांकाळ या चारही तालुक्यांमध्ये दुष्काळी परिस्थिती असतानाही दुष्काळी तालुक्यांमध्ये हे तालुके समाविष्ट का केले नाहीत, असा सवाल आता उपस्थित होऊ लागला आहे. अत्यंत तीव्र दुष्काळी यामध्ये तालुके समाविष्ट केले नाहीत तर शेतकऱ्यांमधून उद्रेक होण्याची शक्यता आहे.